yaadon ke nasheman ko jalaya to nahin hai

yādoñ ke nasheman ko jalāyā to nahīñ hai

ham ne tujhe is dil se bhulāyā to nahīñ hai

kaunain kī vus.at bhī simaT jaatī hai jis meñ

ai dil kahīñ tujh meñ vo samāyā to nahīñ hai

har shai se vo zāhir hai ye ehsān hai us kā

ḳhud ko mirī nazroñ se chhupāyā to nahīñ hai

zulfoñ kī siyāhī meñ ajab husn-e-nihāñ hai

ye raat usī husn kā saayā to nahīñ hai

vāqif haiñ tire dard se ai naġhma-e-ulfat

ham ne tujhe har saaz pe gaayā to nahīñ hai

us ne jo likhā thā kabhī sāhil kī jabīñ par

us naam ko maujoñ ne miTāyā to nahīñ hai

vo shahr kī is bhiiḌ meñ aatā nahīñ 'afzal'

phir bhī chalo dekheñ kahīñ aayā to nahīñ hai

yaadon ke nasheman ko jalaya to nahin hai

hum ne tujhe is dil se bhulaya to nahin hai

kaunain ki wusat bhi simaT jati hai jis mein

ai dil kahin tujh mein wo samaya to nahin hai

har shai se wo zahir hai ye ehsan hai us ka

KHud ko meri nazron se chhupaya to nahin hai

zulfon ki siyahi mein ajab husn-e-nihan hai

ye raat usi husn ka saya to nahin hai

waqif hain tere dard se ai naghma-e-ulfat

hum ne tujhe har saz pe gaya to nahin hai

us ne jo likha tha kabhi sahil ki jabin par

us nam ko maujon ne miTaya to nahin hai

wo shahr ki is bhiD mein aata nahin 'afzal'

phir bhi chalo dekhen kahin aaya to nahin hai