ujla tera bartan hai aur saf tera pani

ujlā tirā bartan hai aur saaf tirā paanī

ik umr kā pyāsā huuñ mujh ko bhī pilā paanī

hai ik ḳhat-e-nādīda dariyā-e-mohabbat meñ

hotā hai jahāñ aa kar paanī se judā paanī

donoñ hī to sachche the ilzām kise dete

kānoñ ne kahā sahrā āñkhoñ ne sunā paanī

kyā kyā na milī miTTī kyā kyā na dhuāñ phailā

kaalā na huā sabza mailā na huā paanī

jab shaam utartī hai kyā dil pe guzartī hai

sāhil ne bahut pūchhā ḳhāmosh rahā paanī

phir dekh ki ye duniyā kaisī nazar aatī hai

'mushtāq' mai-e-ġham meñ thoḌā sā milā paanī

ujla tera bartan hai aur saf tera pani

ek umr ka pyasa hun mujh ko bhi pila pani

hai ek KHat-e-nadida dariya-e-mohabbat mein

hota hai jahan aa kar pani se juda pani

donon hi to sachche the ilzam kise dete

kanon ne kaha sahra aankhon ne suna pani

kya kya na mili miTTi kya kya na dhuan phaila

kala na hua sabza maila na hua pani

jab sham utarti hai kya dil pe guzarti hai

sahil ne bahut puchha KHamosh raha pani

phir dekh ki ye duniya kaisi nazar aati hai

'mushtaq' mai-e-gham mein thoDa sa mila pani