har-chand be-nawa hai kore ghaDe ka pani

har-chand be-navā hai kore ghaḌe kā paanī

dīvān 'mīr' kā hai kore ghaḌe kā paanī

uploñ kī aag ab tak hāthoñ se jhāñktī hai

āñkhoñ meñ jāgtā hai kore ghaḌe kā paanī

jab māñgte haiñ saare añgūr ke sharāre

apnī yahī sadā hai kore ghaḌe kā paanī

kāġhaz pe kaise Thahreñ misre mirī ġhazal ke

lafzoñ meñ bah rahā hai kore ghaḌe kā paanī

ḳhāna-ba-dosh chhorī taktī hai chorī chorī

us kā to aa.ina hai kore ghaḌe kā paanī

chiḌiyoñ sī chahchahā.eñ panghaT pe jab bhī sakhiyāñ

chup-chāp ro diyā hai kore ghaḌe kā paanī

us ke lahū meñ shāyad tāsīr ho vafā kī

jis ne kabhī piyā hai kore ghaḌe kā paanī

izzat zamīr mehnat dānish hunar mohabbat

lekin kabhī bikā hai kore ghaḌe kā paanī

dekhūñ jo chāñdnī meñ lagtā hai mujh ko 'aslam'

pighlī huī duā hai kore ghaḌe kā paanī

har-chand be-nawa hai kore ghaDe ka pani

diwan 'mir' ka hai kore ghaDe ka pani

uplon ki aag ab tak hathon se jhankti hai

aankhon mein jagta hai kore ghaDe ka pani

jab mangte hain sare angur ke sharare

apni yahi sada hai kore ghaDe ka pani

kaghaz pe kaise Thahren misre meri ghazal ke

lafzon mein bah raha hai kore ghaDe ka pani

KHana-ba-dosh chhori takti hai chori chori

us ka to aaina hai kore ghaDe ka pani

chiDiyon si chahchahaen panghaT pe jab bhi sakhiyan

chup-chap ro diya hai kore ghaDe ka pani

us ke lahu mein shayad tasir ho wafa ki

jis ne kabhi piya hai kore ghaDe ka pani

izzat zamir mehnat danish hunar mohabbat

lekin kabhi bika hai kore ghaDe ka pani

dekhun jo chandni mein lagta hai mujh ko 'aslam'

pighli hui dua hai kore ghaDe ka pani