soch yun pahron na yun Dar Dar ke KHana KHana chal

soch yuuñ pahroñ na yuuñ Dar Dar ke ḳhāna ḳhāna chal

chal bisāt-e-vaqt par jo chaal be-bākāna chal

ḳhāk-e-maqtal phir mahak uTThī dil-e-dīvāna chal

mast-o-be-ḳhud zamzama-pardāz-o-be-tābāna chal

tū ne ai chashm-e-fusūñ-gar aur kyā sochā hai ab

ban gayā ik ek ghar ab to uqūbat-ḳhāna chal

habs-e-be-mehrī se ab to aa chalī hoñToñ pe jaañ

ai havā-e-iltifāt-e-yār ab chal yā na chal

maslahat kahtī hai rakh ādāb-e-mahfil kā ḳhayāl

dil ba-zid hai aaj us mahfil meñ gustāḳhāna chal

hādse bhī ḳhvāhishoñ ke saath haiñ mahv-e-safar

apne gird-o-pesh se ho kar na yuuñ begānā chal

ban ke ik āñdhī nikal galiyoñ meñ ai āshob-e-jāñ

misl-e-sargoshī na yuuñ kāshāna-dar-kāshāna chal

āḳhrī baazī hai ye har shai lagegī daañv par

hai ye naqd-e-jāñ ye dil sā gauhar-e-yak-dāna chal

dar-pa.e-īzā rahegā dard-e-dil 'ḳhāvar' yūñhī

sar-ba-zānū baiTh ghar meñ yā sar-e-vīrāna chal

soch yun pahron na yun Dar Dar ke KHana KHana chal

chal bisat-e-waqt par jo chaal be-bakana chal

KHak-e-maqtal phir mahak uTThi dil-e-diwana chal

mast-o-be-KHud zamzama-pardaz-o-be-tabana chal

tu ne ai chashm-e-fusun-gar aur kya socha hai ab

ban gaya ek ek ghar ab to uqubat-KHana chal

habs-e-be-mehri se ab to aa chali honTon pe jaan

ai hawa-e-iltifat-e-yar ab chal ya na chal

maslahat kahti hai rakh aadab-e-mahfil ka KHayal

dil ba-zid hai aaj us mahfil mein gustaKHana chal

hadse bhi KHwahishon ke sath hain mahw-e-safar

apne gird-o-pesh se ho kar na yun begana chal

ban ke ek aandhi nikal galiyon mein ai aashob-e-jaan

misl-e-sargoshi na yun kashana-dar-kashana chal

aaKHri bazi hai ye har shai lagegi danw par

hai ye naqd-e-jaan ye dil sa gauhar-e-yak-dana chal

dar-pae-iza rahega dard-e-dil 'KHawar' yunhi

sar-ba-zanu baiTh ghar mein ya sar-e-virana chal