rafta rafta sitare sabhi bujh gae chand Dhalne laga
rafta rafta sitāre sabhī bujh ga.e chāñd Dhalne lagā
raat ruḳhsat huī aur diyā niiñd kī samt chalne lagā
log maazī ke marghaT se chunñe lage sar kaTī vahshateñ
vaqt kī kokh meñ ik nayā sāniha phir se palne lagā
manziloñ kā ta'ayyun zarūrī hai āġhāz se pesh-tar
varna ġhāza safar kā to be-kār chehre pe malne lagā
duur 'ufuq par kahīñ surma.ī bādaloñ kī jhalak dekh kar
dhuup be-kal huī aur sahrāoñ kā dam nikalne lagā
pahle pahle to samjhā thā maiñ zindagī tere bin kuchh nahīñ
rafta rafta magar zaḳhm bharne lage dil sañbhalne lagā
rafta rafta sitare sabhi bujh gae chand Dhalne laga
raat ruKHsat hui aur diya nind ki samt chalne laga
log mazi ke marghaT se chunne lage sar kaTi wahshaten
waqt ki kokh mein ek naya saniha phir se palne laga
manzilon ka ta'ayyun zaruri hai aaghaz se pesh-tar
warna ghaza safar ka to be-kar chehre pe malne laga
dur 'ufuq par kahin surmai baadalon ki jhalak dekh kar
dhup be-kal hui aur sahraon ka dam nikalne laga
pahle pahle to samjha tha main zindagi tere bin kuchh nahin
rafta rafta magar zaKHm bharne lage dil sanbhalne laga
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
