bahaar aai kisi ka samna karne ka waqt aaya

bahār aa.ī kisī kā sāmnā karne kā vaqt aayā

sambhal ai dil ki iz.hār-e-vafā karne kā vaqt aayā

unheñ āmāda-e-mehr-o-vafā karne kā vaqt aayā

baḌī muddat meñ arz-e-mudda.ā karne kā vaqt aayā

ravāñ haiñ apne markaz kī taraf āsūda ummīdeñ

hujūm-e-yās ko dil se judā karne kā vaqt aayā

phir ik gum-karda-rāh-e-zindagī ko mil ga.ī manzil

sujūd-e-shukr-e-be-pāyāñ adā karne kā vaqt aayā

kabhī duurī thī lekin ab ḳhayāl-e-ḳhauf-e-dūrī hai

fuġhāñ kī sā.ateñ guzrīñ duā karne kā vaqt aayā

kahāñ tak ḳhatm rahtā darmiyāñ par dil kā afsāna

bil-āḳhir darmiyāñ se ibtidā karne kā vaqt aayā

har ik jurm-e-mohabbat us nigāh-e-lutf ke sadqe

naved-e-āfiyat le kar ḳhatā karne kā vaqt aayā

nigāh o dil se ab tafsīr-o-sharh-e-āzrū hogī

zabān o lab se tark-e-iltijā karne kā vaqt aayā

vo aate haiñ 'shakīl' ab apne dil se haath dho baiTho

nigāh-e-nāz kī qīmat adā karne kā vaqt aayā

bahaar aai kisi ka samna karne ka waqt aaya

sambhal ai dil ki izhaar-e-wafa karne ka waqt aaya

unhen aamada-e-mehr-o-wafa karne ka waqt aaya

baDi muddat mein arz-e-muddaa karne ka waqt aaya

rawan hain apne markaz ki taraf aasuda ummiden

hujum-e-yas ko dil se juda karne ka waqt aaya

phir ek gum-karda-rah-e-zindagi ko mil gai manzil

sujud-e-shukr-e-be-payan ada karne ka waqt aaya

kabhi duri thi lekin ab KHayal-e-KHauf-e-duri hai

fughan ki saaten guzrin dua karne ka waqt aaya

kahan tak KHatm rahta darmiyan par dil ka afsana

bil-aKHir darmiyan se ibtida karne ka waqt aaya

har ek jurm-e-mohabbat us nigah-e-lutf ke sadqe

nawed-e-afiyat le kar KHata karne ka waqt aaya

nigah o dil se ab tafsir-o-sharh-e-azru hogi

zaban o lab se tark-e-iltija karne ka waqt aaya

wo aate hain 'shakil' ab apne dil se hath dho baiTho

nigah-e-naz ki qimat ada karne ka waqt aaya