parchhaiyon ke ban mein kahin aa gaya hun main

parchhā.iyoñ ke ban meñ kahīñ aa gayā huuñ maiñ

daur-e-sitam kā ek nayā tajraba huuñ maiñ

chehroñ kī ek bhiiḌ sadāoñ kā ik julūs

terī galī meñ aa ke tamāshā banā huuñ maiñ

ik 'umr se ye kis kā mujhe intizār hai

jaltī huī siyāh saḌak par khaḌā huuñ maiñ

kitnī kaḌī masāfateñ haiñ mere ham rikāb

roz-e-azal se apne liye hādsa huuñ maiñ

vo sub.h merā haath jhaTak kar chalī ga.ī

rātoñ kā zahr phāñk ke pachhtā rahā huuñ maiñ

ābādiyāñ bhī mujh ko rifāqat na de sakīñ

tanhā.ī kī salīb pe laTkā rahā huuñ maiñ

maqtal meñ baT gayā hai mirā reza reza jism

bahte hue lahū ko nazar aa rahā huuñ maiñ

'fāriġh' dukhe diloñ ke na maiñ kaam aa sakā

sharmindagī se uñgliyāñ chaTḳhā rahā huuñ maiñ

parchhaiyon ke ban mein kahin aa gaya hun main

daur-e-sitam ka ek naya tajraba hun main

chehron ki ek bhiD sadaon ka ek julus

teri gali mein aa ke tamasha bana hun main

ek 'umr se ye kis ka mujhe intizar hai

jalti hui siyah saDak par khaDa hun main

kitni kaDi masafaten hain mere hum rikab

roz-e-azal se apne liye hadsa hun main

wo subh mera hath jhaTak kar chali gai

raaton ka zahr phank ke pachhta raha hun main

aabaadiyan bhi mujh ko rifaqat na de sakin

tanhai ki salib pe laTka raha hun main

maqtal mein baT gaya hai mera reza reza jism

bahte hue lahu ko nazar aa raha hun main

'farigh' dukhe dilon ke na main kaam aa saka

sharmindagi se ungliyan chaTKHa raha hun main