meri nigah mein aks-e-tamam kis ka hai

mirī nigāh meñ 'aks-e-tamām kis kā hai

ye intizār mujhe sub.h-o-shām kis kā hai

tasavvurāt kī jaltī huī tarā.ī meñ

bichhā huā tah-e-ehsās daam kis kā hai

koī bhī chehra shanāsā nazar nahīñ aatā

maiñ aa gayā huuñ kahāñ ye maqām kis kā hai

ye kis kī shakl mirī shakl meñ hai paivasta

mire vujūd se vābasta naam kis kā hai

maiñ apne qatl kī ḳhud kar rahā huuñ kyuuñ sāzish

mire lahū meñ nihāñ intiqām kis kā hai

ye kis kī guuñj kī ḳhushbū rachī hai zehnoñ meñ

kalīm kaun hai aisā kalām kis kā hai

uThā.e bār-e-hayāt-e-guzashta kāñdhe par

abhī abhī jo gayā hai ġhulām kis kā hai

meri nigah mein 'aks-e-tamam kis ka hai

ye intizar mujhe subh-o-sham kis ka hai

tasawwuraat ki jalti hui tarai mein

bichha hua tah-e-ehsas dam kis ka hai

koi bhi chehra shanasa nazar nahin aata

main aa gaya hun kahan ye maqam kis ka hai

ye kis ki shakl meri shakl mein hai paiwasta

mere wujud se wabasta nam kis ka hai

main apne qatl ki KHud kar raha hun kyun sazish

mere lahu mein nihan intiqam kis ka hai

ye kis ki gunj ki KHushbu rachi hai zehnon mein

kalim kaun hai aisa kalam kis ka hai

uThae bar-e-hayat-e-guzashta kandhe par

abhi abhi jo gaya hai ghulam kis ka hai