main sochta hun wahi kuchh jo is sadi ka hai
maiñ sochtā huuñ vahī kuchh jo is sadī kā hai
ki ab to gahrā bahut zaḳhm āgahī kā hai
agar tū shab kī chaTāneñ nahīñ tarāsh sakā
to kyā qusūr sitāroñ kī raushnī kā hai
ubhar ke zaḳhm-e-vafā aa ga.e haiñ āñkhoñ meñ
vo haal shīsha-e-dil kī shikastagī kā hai
use maiñ sub.h-e-bahārāñ kā naam kaise duuñ
ki gard gard sā chehra kalī kalī kā hai
jalegā 'tāb' kahāñ tak havā ke hāthoñ meñ
ye ik charāġh jo siine meñ zindagī kā hai
main sochta hun wahi kuchh jo is sadi ka hai
ki ab to gahra bahut zaKHm aagahi ka hai
agar tu shab ki chaTanen nahin tarash saka
to kya qusur sitaron ki raushni ka hai
ubhar ke zaKHm-e-wafa aa gae hain aankhon mein
wo haal shisha-e-dil ki shikastagi ka hai
use main subh-e-bahaaran ka nam kaise dun
ki gard gard sa chehra kali kali ka hai
jalega 'tab' kahan tak hawa ke hathon mein
ye ek charagh jo sine mein zindagi ka hai
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
