KHwab mar jaenge KHud-ba-KHud ek din KHwab ki chah bhi mar di jaegi

ḳhvāb mar jā.eñge ḳhud-ba-ḳhud ek din ḳhvāb kī chaah bhī maar dī jā.egī

ātish-e-dil bhī paḌ jā.egī sard aur ek din quvvat-e-āh bhī jā.egī

rafta rafta kaTegī shab-e-zindagī dhīme dhīme jalegā charāġh-e-baqā

sub.h lā.egī dast-e-sabā meñ fanā aur phir duur tak raushnī jā.egī

ek din mere kamre kī ThanDī havā sard kar degī merā badan aur phir

ik laTaktī huī murda rassī ke gird ek zinda kahānī bunī jā.egī

mere kamre kī tanhā.iyāñ mustaqil detī rahtī haiñ mujh ko dilāsa yahī

ek din aap se milne ā.eñge log ek din aap par baat kī jā.egī

maut kī raah par zindagī se pare bhiiḌ ke saath ḳhāmoshiyoñ kī taraf

jism bhī gungunātā huā jā.egā ruuh bhī muskurātī huī jā.egī

sochtā huuñ ki ye ḳhanda-lab shoḳh-jāñ ek din nā-gahāñ mar gayā jo 'safīr'

phir kahāñ sar chhupā.egā shauq-e-junūñ kis ke ghar ḳhū-e-āvārgī jā.egī

KHwab mar jaenge KHud-ba-KHud ek din KHwab ki chah bhi mar di jaegi

aatish-e-dil bhi paD jaegi sard aur ek din quwwat-e-ah bhi jaegi

rafta rafta kaTegi shab-e-zindagi dhime dhime jalega charagh-e-baqa

subh laegi dast-e-saba mein fana aur phir dur tak raushni jaegi

ek din mere kamre ki ThanDi hawa sard kar degi mera badan aur phir

ek laTakti hui murda rassi ke gird ek zinda kahani buni jaegi

mere kamre ki tanhaiyan mustaqil deti rahti hain mujh ko dilasa yahi

ek din aap se milne aaenge log ek din aap par baat ki jaegi

maut ki rah par zindagi se pare bhiD ke sath KHamoshiyon ki taraf

jism bhi gungunata hua jaega ruh bhi muskuraati hui jaegi

sochta hun ki ye KHanda-lab shoKH-jaan ek din na-gahan mar gaya jo 'safir'

phir kahan sar chhupaega shauq-e-junun kis ke ghar KHu-e-awargi jaegi