kaisi kaisi suraten ai dil dikhata hai mujhe

kaisī kaisī sūrateñ ai dil dikhātā hai mujhe

kis liye āḳhir tū ā.īna banātā hai mujhe

merā dukh siine meñ fasl-e-dūr-ras kī āñdhiyāñ

aur tū ehsās ke bistar pe laatā hai mujhe

ḳhuun kī bārish huī lafzoñ ke dariyā bah gaye

har ghaḌī tū ek hī qissa sunātā hai mujhe

Dūbte sūraj kā har manzar mirī āñkhoñ meñ hai

kaisā pāgal hai añdheroñ se Darātā hai mujhe

sach kahā tū ne ki pyāsī ret kā sahrā huuñ maiñ

ek patthar meñ simaT jaanā bhī aatā hai mujhe

maiñ charāġh-e-rāh huuñ lekin faqat apne liye

kyā bigaḌtā hai tirā tū kyuuñ bujhātā hai mujhe

kaun sī manzil pe laa.ī hai mujhe apnī havas

kyā samajh kar merī āñkhoñ se girātā hai mujhe

'arsa-e-zulmāt meñ ye raushnī bhī kam nahīñ

kis nashe meñ chuur hai tū kyuuñ gañvātā hai mujhe

be-karāñ hone kī ḳhvāhish aur ye andhī galī

kyā burā thā maiñ ki miTTī meñ chhupātā hai mujhe

vo uchaTtī sī nazar bas ek pal kī baat thī

ab vahī lamha havāoñ meñ uḌātā hai mujhe

sādgī merī ki tujh ko rishta-e-jāñ keh diyā

hausla terā ki aksar bhuul jaatā hai mujhe

un jazīroñ ko ḳhabar kar de jo aage ā.eñge

pāniyoñ kī tarh ye dariyā bahātā hai mujhe

phir fasīl-e-shahr tak jā kar palaT ā.ūñgā maiñ

phir vahī jangal kā sannāTā bulātā hai mujhe

is ridā-e-nīl ke pīchhe na jaane kaun hai

thapkiyāñ de de ke rātoñ ko sulātā hai mujhe

canvas par aur kuchh be-nām tasvīreñ bhī haiñ

nuqta nuqta kaun hai jo yuuñ miTātā hai mujhe

ḳhaak andar ḳhaak merī 'umr bhar kī justujū

dā.era-dar-dā.era koī ghumātā hai mujhe

kaisi kaisi suraten ai dil dikhata hai mujhe

kis liye aaKHir tu aaina banata hai mujhe

mera dukh sine mein fasl-e-dur-ras ki aandhiyan

aur tu ehsas ke bistar pe lata hai mujhe

KHun ki barish hui lafzon ke dariya bah gaye

har ghaDi tu ek hi qissa sunata hai mujhe

Dubte suraj ka har manzar meri aankhon mein hai

kaisa pagal hai andheron se Daraata hai mujhe

sach kaha tu ne ki pyasi ret ka sahra hun main

ek patthar mein simaT jaana bhi aata hai mujhe

main charagh-e-rah hun lekin faqat apne liye

kya bigaDta hai tera tu kyun bujhata hai mujhe

kaun si manzil pe lai hai mujhe apni hawas

kya samajh kar meri aankhon se giraata hai mujhe

'arsa-e-zulmat mein ye raushni bhi kam nahin

kis nashe mein chur hai tu kyun ganwata hai mujhe

be-karan hone ki KHwahish aur ye andhi gali

kya bura tha main ki miTTi mein chhupata hai mujhe

wo uchaTti si nazar bas ek pal ki baat thi

ab wahi lamha hawaon mein uData hai mujhe

sadgi meri ki tujh ko rishta-e-jaan keh diya

hausla tera ki aksar bhul jata hai mujhe

un jaziron ko KHabar kar de jo aage aaenge

paniyon ki tarh ye dariya bahata hai mujhe

phir fasil-e-shahr tak ja kar palaT aaunga main

phir wahi jangal ka sannaTa bulata hai mujhe

is rida-e-nil ke pichhe na jaane kaun hai

thapkiyan de de ke raaton ko sulata hai mujhe

canwas par aur kuchh be-nam taswiren bhi hain

nuqta nuqta kaun hai jo yun miTata hai mujhe

KHak andar KHak meri 'umr bhar ki justuju

daera-dar-daera koi ghumata hai mujhe