shahr-e-gul ke KHas-o-KHashak se KHauf aata hai

shahr-e-gul ke ḳhas-o-ḳhāshāk se ḳhauf aatā hai

jis kā vāris huuñ usī ḳhaak se ḳhauf aatā hai

shakl banñe nahīñ paatī ki bigaḌ jaatī hai

na.ī miTTī ko na.e chaak se ḳhauf aatā hai

vaqt ne aise ghumā.e ufuq āfāq ki bas

mehvar-e-gardish-e-saffāk se ḳhauf aatā hai

yahī lahja thā ki meyār-e-suḳhan Thahrā thā

ab isī lahja-e-be-bāk se ḳhauf aatā hai

aag jab aag se miltī hai to lau detī hai

ḳhaak ko ḳhaak kī poshāk se ḳhauf aatā hai

qāmat-e-jāñ ko ḳhush aayā thā kabhī ḳhil.at-e-ishq

ab isī jāma-e-sad-chāk se ḳhauf aatā hai

kabhī aflāk se nāloñ ke javāb aate the

in dinoñ ālam-e-aflāk se ḳhauf aatā hai

rahmat-e-sayyad-e-laulāk pe kāmil īmān

ummat-e-sayyad-e-laulāk se ḳhauf aatā hai

shahr-e-gul ke KHas-o-KHashak se KHauf aata hai

jis ka waris hun usi KHak se KHauf aata hai

shakl banne nahin pati ki bigaD jati hai

nai miTTi ko nae chaak se KHauf aata hai

waqt ne aise ghumae ufuq aafaq ki bas

mehwar-e-gardish-e-saffak se KHauf aata hai

yahi lahja tha ki meyar-e-suKHan Thahra tha

ab isi lahja-e-be-bak se KHauf aata hai

aag jab aag se milti hai to lau deti hai

KHak ko KHak ki poshak se KHauf aata hai

qamat-e-jaan ko KHush aaya tha kabhi KHilat-e-ishq

ab isi jama-e-sad-chaak se KHauf aata hai

kabhi aflak se nalon ke jawab aate the

in dinon aalam-e-aflak se KHauf aata hai

rahmat-e-sayyad-e-laulak pe kaamil iman

ummat-e-sayyad-e-laulak se KHauf aata hai