shab-e-firaq yun wahshat-taraaz hoti gai

shab-e-firāq yuuñ vahshat-tarāz hotī ga.ī

ki āh-e-nīm-adā daf-navāz hotī ga.ī

har ik Darāvne sapne ne DhūñD lī tā'bīr

har ik suhānī haqīqat majāz hotī ga.ī

lahū ke josh se sākit badan thirakne lage

suroñ kī zarb se dīvār saaz hotī ga.ī

ukhaḌ ke noch liyā nāḳhunoñ ne apnā hī gosht

har ek jism se jaañ be-niyāz hotī ga.ī

dil-e-tabāh ko rassī ke khel bhāne lage

so apnī tab'-e-ravāñ band-bāz hotī ga.ī

hameñ na 'ishq mayassar huā na maut 'safīr'

bas iztirāb kī rassī darāz hotī ga.ī

shab-e-firaq yun wahshat-taraaz hoti gai

ki aah-e-nim-ada daf-nawaz hoti gai

har ek Darawne sapne ne DhunD li ta'bir

har ek suhani haqiqat majaz hoti gai

lahu ke josh se sakit badan thirakne lage

suron ki zarb se diwar saz hoti gai

ukhaD ke noch liya naKHunon ne apna hi gosht

har ek jism se jaan be-niyaz hoti gai

dil-e-tabah ko rassi ke khel bhane lage

so apni tab'-e-rawan band-baz hoti gai

hamein na 'ishq mayassar hua na maut 'safir'

bas iztirab ki rassi daraaz hoti gai