abhi tak yaad hai mujhko shab-e-gham-nak matam ki

abhī tak yaad hai mujh ko shab-e-ġham-nāk mātam kī

'ajab thī shor-angezī fazā meñ ātish-e-nam kī

'azīz-az-jān thā sandūqche bhī le gayā zālim

qabā.eñ kaisī kaisī us meñ thiiñ kam-ḳhvāb-o-resham kī

hamāre shahr-e-jāñ meñ thā nashāt-angez mausam ik

dar-o-dīvār par ugne lagī haiñ vahshateñ ġham kī

maiñ apnī ḳhud-faroshī kī sharā.it par rahā qaa.em

ḳharīdār-e-vafā ke sāmne qīmat nahīñ kam kī

daraḳhtoñ kī qatāreñ shahr meñ ārām kartī haiñ

chamaktī hai magar un par bhī ab talvār mausam kī

fazā kī tīrgī se dil-fasurda thā huā kuchh yuuñ

badan ke har 'ilāqe meñ kiran mahtāb kī chamkī

lahū ke rang-o-gul se maiñ ne ik bastī banā.ī hai

badaltī hai har ik lamha magar tasvīr 'ālam kī

tumhārī chashm-e-āhū ne hameñ kaise kiyā qaidī

sabīleñ DhūñDne meñ ham ne kotāhī kahāñ kam kī

mire kashkol kī duniyā zarā sayyāl ho jaa.e

mayassar ho mujhe sahrā-nashīnī yā nazar jam kī

abhi tak yaad hai mujh ko shab-e-gham-nak matam ki

'ajab thi shor-angezi faza mein aatish-e-nam ki

'aziz-az-jaan tha sanduqche bhi le gaya zalim

qabaen kaisi kaisi us mein thin kam-KHwab-o-resham ki

hamare shahr-e-jaan mein tha nashat-angez mausam ek

dar-o-diwar par ugne lagi hain wahshaten gham ki

main apni KHud-faroshi ki sharait par raha qaem

KHaridar-e-wafa ke samne qimat nahin kam ki

daraKHton ki qataren shahr mein aaram karti hain

chamakti hai magar un par bhi ab talwar mausam ki

faza ki tirgi se dil-fasurda tha hua kuchh yun

badan ke har 'ilaqe mein kiran mahtab ki chamki

lahu ke rang-o-gul se main ne ek basti banai hai

badalti hai har ek lamha magar taswir 'alam ki

tumhaari chashm-e-ahu ne hamein kaise kiya qaidi

sabilen DhunDne mein hum ne kotahi kahan kam ki

mere kashkol ki duniya zara sayyal ho jae

mayassar ho mujhe sahra-nashini ya nazar jam ki