tere KHayal ke hujre mein aa ke baiTh gaya

tire ḳhayāl ke hujre meñ aa ke baiTh gayā

faqīr-e-'ishq musallā bichhā ke baiTh gayā

hañsī-ḳhushī use ruḳhsat to kar diyā lekin

darūn-e-jism koī thartharā ke baiTh gayā

mushā'ire meñ ġhazal der tak mahaktī rahī

maiñ terā naam faqat gungunā ke baiTh gayā

bulandiyāñ use jhuk kar salām karne lagīñ

tire diyār meñ jo sar jhukā ke baiTh gayā

udaas hone lagī thī mirī ye tanhā.ī

maiñ terī yaad ke pahlū meñ jā ke baiTh gayā

adā kare na kare vo vafā kī rasm magar

mirī taraf se maiñ sab kuchh luTā ke baiTh gayā

kabhī-kabhār nayā zaḳhm bhī lagā detā

'ajīb dost hai mujh ko bhulā ke baiTh gayā

bahut ġhurūr thā is shahr ke sitāroñ ko

charāġh shaam se maiñ bhī jalā ke baiTh gayā

tirī galī meñ bhī terā nasha thā yuuñ 'sāgar'

guzar huā jo kabhī laḌkhaḌā ke baiTh gayā

tere KHayal ke hujre mein aa ke baiTh gaya

faqir-e-'ishq musalla bichha ke baiTh gaya

hansi-KHushi use ruKHsat to kar diya lekin

darun-e-jism koi tharthara ke baiTh gaya

musha'ire mein ghazal der tak mahakti rahi

main tera nam faqat gunguna ke baiTh gaya

bulandiyan use jhuk kar salam karne lagin

tere diyar mein jo sar jhuka ke baiTh gaya

udas hone lagi thi meri ye tanhai

main teri yaad ke pahlu mein ja ke baiTh gaya

ada kare na kare wo wafa ki rasm magar

meri taraf se main sab kuchh luTa ke baiTh gaya

kabhi-kabhaar naya zaKHm bhi laga deta

'ajib dost hai mujh ko bhula ke baiTh gaya

bahut ghurur tha is shahr ke sitaron ko

charagh sham se main bhi jala ke baiTh gaya

teri gali mein bhi tera nasha tha yun 'sagar'

guzar hua jo kabhi laDkhaDa ke baiTh gaya