shahr-e-be-mehr mein ab rasm-e-wafa yaad nahin

shahr-e-be-mehr meñ ab rasm-e-vafā yaad nahīñ

kis ko chāhā thā yahāñ kis kā gila yaad nahīñ

baat karne ko taraste haiñ masīhā mere

zaḳhm to yaad haiñ zaḳhmoñ kī davā yaad nahīñ

ham se pūchhe koī duniyā kī malāmat kā 'azāb

log kyā kahte haiñ ab bahr-e-ḳhudā yaad nahīñ

ham ne duniyā ke havādis ko jiyā hai aise

ab to marne kī bhī ham ko to adā yaad nahīñ

itne sadme haiñ ki ab hosh nahīñ hai apnā

ham ne kyā khoyā thā kyā ham ko milā yaad nahīñ

log kahte haiñ ki duniyā baḌī rangīñ hai miyāñ

ham ko to ḳhaak ke zarroñ ke sivā yaad nahīñ

jis kī ḳhātir maiñ zamāne se laḌā thā tanhā

aaj dekhā to use merā patā yaad nahīñ

ab to har haath meñ patthar hī nazar aatā hai

kis ne dī thī hameñ phūloñ kī qabā yaad nahīñ

log kahte haiñ ki 'sāhil' tirā 'ālam kyā hai

be-ḳhudī aisī hai ḳhud apnā patā yaad nahīñ

shahr-e-be-mehr mein ab rasm-e-wafa yaad nahin

kis ko chaha tha yahan kis ka gila yaad nahin

baat karne ko taraste hain masiha mere

zaKHm to yaad hain zaKHmon ki dawa yaad nahin

hum se puchhe koi duniya ki malamat ka 'azab

log kya kahte hain ab bahr-e-KHuda yaad nahin

hum ne duniya ke hawadis ko jiya hai aise

ab to marne ki bhi hum ko to ada yaad nahin

itne sadme hain ki ab hosh nahin hai apna

hum ne kya khoya tha kya hum ko mila yaad nahin

log kahte hain ki duniya baDi rangin hai miyan

hum ko to KHak ke zarron ke siwa yaad nahin

jis ki KHatir main zamane se laDa tha tanha

aaj dekha to use mera pata yaad nahin

ab to har hath mein patthar hi nazar aata hai

kis ne di thi hamein phulon ki qaba yaad nahin

log kahte hain ki 'sahil' tera 'alam kya hai

be-KHudi aisi hai KHud apna pata yaad nahin