shab-e-hijran falak par jab sitare jagmagate hain

shab-e-hijrāñ falak par jab sitāre jagmagāte haiñ

to mujh ko ye gumāñ hotā hai vo tashrīf laate haiñ

mirī barbādiyoñ par saarī duniyā muskurātī hai

akele aap āḳhir kis liye aañsū bahāte haiñ

hamārā hausla to dekh ai barq-e-sitam-pesha

nasheman phir isī ujḌe gulistāñ meñ banāte haiñ

qarīb aa kar jo ho jaate haiñ ojhal merī nazroñ se

vo furqat kā alam sahnā mujhe aksar sikhāte haiñ

vo apnī guftugū ko ḳhūbsūrat mashġhala keh kar

kisī par tanz karte haiñ kisī kā dil dukhāte haiñ

ham apne muhsinoñ ko bhuul jaa.eñ ye nahīñ mumkin

magar apnā karam apnī saḳhāvat bhuul jaate haiñ

hamesha ḳhairiyat ham pūchh lete haiñ 'azīzoñ kī

magar rūdād-e-ġham apnī kahāñ un ko sunāte haiñ

vafā-dārī huī sharminda-e-tā'bīr kab un se

vafāoñ ke tarāne yuuñ to aksar gungunāte haiñ

ham un kī diid kī hasrat liye baiThe to haiñ 'kāvish'

vo dekheñ kab harīm-e-nāz ke parde uThāte haiñ

shab-e-hijran falak par jab sitare jagmagate hain

to mujh ko ye guman hota hai wo tashrif late hain

meri barbaadiyon par sari duniya muskuraati hai

akele aap aaKHir kis liye aansu bahate hain

hamara hausla to dekh ai barq-e-sitam-pesha

nasheman phir isi ujDe gulistan mein banate hain

qarib aa kar jo ho jate hain ojhal meri nazron se

wo furqat ka alam sahna mujhe aksar sikhate hain

wo apni guftugu ko KHubsurat mashghala keh kar

kisi par tanz karte hain kisi ka dil dukhate hain

hum apne muhsinon ko bhul jaen ye nahin mumkin

magar apna karam apni saKHawat bhul jate hain

hamesha KHairiyat hum puchh lete hain 'azizon ki

magar rudad-e-gham apni kahan un ko sunate hain

wafa-dari hui sharminda-e-ta'bir kab un se

wafaon ke tarane yun to aksar gungunate hain

hum un ki did ki hasrat liye baiThe to hain 'kawish'

wo dekhen kab harim-e-naz ke parde uThate hain