mujhko apna lijiye mere abhi ban jaiye

mujh ko apnā lījiye mere abhī ban jā.iye

varna ḳhud se duur kiije ajnabī ban jā.iye

chand lamhoñ ke liye milnā koī milnā nahīñ

is tarah miliye ki juzv-e-zindagī ban jā.iye

jis ko maddham kar na paa.e gardish-e-lail-o-nahār

safha-e-hastī pe vo harf-e-jalī ban jā.iye

chhoḌ kar ahbāb ke zehnoñ meñ yādoñ ke nuqūsh

jo kabhī puurī na ho aisī kamī ban jā.iye

aap par mauqūf hai ban jā.iye vaj.h-e-qarār

yā udāsī ranj-o-ġham aur be-kalī ban jā.iye

paas ā.īn-e-vafā rakh kar bhī kuchh miltā nahīñ

gar zamāna be-vafā hai aap bhī ban jā.iye

she'r paḌhiye bahr se ḳhārij sar-e-bazm-e-suḳhan

aur phir ustād-e-fann-e-shā'irī ban jā.iye

ban na paa.e aap 'az.har' un ke hoñToñ kī hañsī

chhoḌ kar duniyā un āñkhoñ kī namī ban jā.iye

mujh ko apna lijiye mere abhi ban jaiye

warna KHud se dur kije ajnabi ban jaiye

chand lamhon ke liye milna koi milna nahin

is tarah miliye ki juzw-e-zindagi ban jaiye

jis ko maddham kar na pae gardish-e-lail-o-nahaar

safha-e-hasti pe wo harf-e-jali ban jaiye

chhoD kar ahbab ke zehnon mein yaadon ke nuqush

jo kabhi puri na ho aisi kami ban jaiye

aap par mauquf hai ban jaiye wajh-e-qarar

ya udasi ranj-o-gham aur be-kali ban jaiye

pas aain-e-wafa rakh kar bhi kuchh milta nahin

gar zamana be-wafa hai aap bhi ban jaiye

she'r paDhiye bahr se KHarij sar-e-bazm-e-suKHan

aur phir ustad-e-fann-e-sha'iri ban jaiye

ban na pae aap 'azhar' un ke honTon ki hansi

chhoD kar duniya un aankhon ki nami ban jaiye