mil na sakti koi tamsil-e-wafa mere baad

mil na saktī koī tamsīl-e-vafā mere baa'd

maiñ to ḳhush huuñ vo mujhe bhuul gayā mere baa'd

ḳhud tire shahr ke logoñ kī ravish kahtī hai

badlī badlī sī hai galiyoñ kī fazā mere baa'd

istilāhāt-e-mohabbat meñ sadāqat na rahī

lafz-o-mā'nī hue ro ro ke judā mere baa'd

ḳhush raheñ husn-e-mudārāt pe marne vaale

vo agar ho bhī to kis se ho ḳhafā mere baa'd

na huā chaak koī dil na koī jaan halāk

muddatoñ tazkira-e-dost huā mere baa'd

'ishq ne husn se tevar hī badal rakkhe haiñ

na rahe nāz-o-adā nāz-o-adā mere baa'd

kis meñ tāqat thī ki mahrūm-e-tavajjoh hī rahe

koī mujrim nahīñ mahrūm-e-sazā mere baa'd

bāñkpan thā jo vo ik chāhne vāloñ meñ vahāñ

vo huā sheva-e-taslīm-o-razā mere baa'd

haa.e vo mashġhala-e-tanz-o-tamasḳhur mujh se

jo banā tazkira-e-sidq-o-safā mere baa'd

kufr kar jaa.eñ magar us ko payambar jāneñ

jis ke dāman meñ ho ḳhushbu-e-vafā mere baa'd

mil na sakti koi tamsil-e-wafa mere ba'd

main to KHush hun wo mujhe bhul gaya mere ba'd

KHud tere shahr ke logon ki rawish kahti hai

badli badli si hai galiyon ki faza mere ba'd

istilahat-e-mohabbat mein sadaqat na rahi

lafz-o-ma'ni hue ro ro ke juda mere ba'd

KHush rahen husn-e-mudaraat pe marne wale

wo agar ho bhi to kis se ho KHafa mere ba'd

na hua chaak koi dil na koi jaan halak

muddaton tazkira-e-dost hua mere ba'd

'ishq ne husn se tewar hi badal rakkhe hain

na rahe naz-o-ada naz-o-ada mere ba'd

kis mein taqat thi ki mahrum-e-tawajjoh hi rahe

koi mujrim nahin mahrum-e-saza mere ba'd

bankpan tha jo wo ek chahne walon mein wahan

wo hua shewa-e-taslim-o-raza mere ba'd

hae wo mashghala-e-tanz-o-tamasKHur mujh se

jo bana tazkira-e-sidq-o-safa mere ba'd

kufr kar jaen magar us ko payambar jaanen

jis ke daman mein ho KHushbu-e-wafa mere ba'd