kyun sham bujh ke rah gai kaisi hawa lagi

kyuuñ sham' bujh ke rah ga.ī kaisī havā lagī

ai ahl-e-bazm koī to bolo ḳhudā-lagī

duniyā-e-dūñ se bhaag ke ham mai-kade gaye

ab kyuuñ hamāre saath hai ye be-hayā lagī

vo log ab kahāñ haiñ vo chehre kidhar gaye

ai shahr-e-husn kis kī tujhe bad-du'ā lagī

ham kyuuñ na apne aap pe nāzāñ hoñ sāhibo

ham par hī kyuuñ ye tohmat-e-mehr-o-vafā lagī

saa.e se kuchh qarīb se ho kar guzar gaye

pichhle pahar ko aañkh abhī thī zarā lagī

kyā ab idhar na ā.eñge ḳhushbū ke qāfile

tujh ko ḳhabar kahāñ se ye bād-e-sabā lagī

ham jal ke ḳhaak ho ga.e ye aur baat hai

kuchh un ke dil meñ aag thī ham se sivā lagī

kuchh din rahe the zulf-e-pareshāñ kī qaid meñ

phir apne saath aur na koī balā lagī

ham tishna-lab to tere du'ā-go haiñ phir batā

hai kaun jis kī tujh ko nazar sāqiyā lagī

bas ik husain kā nahīñ miltā kahīñ surāġh

yuuñ har galī yahāñ kī hameñ karbalā lagī

kyun sham' bujh ke rah gai kaisi hawa lagi

ai ahl-e-bazm koi to bolo KHuda-lagi

duniya-e-dun se bhag ke hum mai-kade gaye

ab kyun hamare sath hai ye be-haya lagi

wo log ab kahan hain wo chehre kidhar gaye

ai shahr-e-husn kis ki tujhe bad-du'a lagi

hum kyun na apne aap pe nazan hon sahibo

hum par hi kyun ye tohmat-e-mehr-o-wafa lagi

sae se kuchh qarib se ho kar guzar gaye

pichhle pahar ko aankh abhi thi zara lagi

kya ab idhar na aaenge KHushbu ke qafile

tujh ko KHabar kahan se ye baad-e-saba lagi

hum jal ke KHak ho gae ye aur baat hai

kuchh un ke dil mein aag thi hum se siwa lagi

kuchh din rahe the zulf-e-pareshan ki qaid mein

phir apne sath aur na koi bala lagi

hum tishna-lab to tere du'a-go hain phir bata

hai kaun jis ki tujh ko nazar saqiya lagi

bas ek husain ka nahin milta kahin suragh

yun har gali yahan ki hamein karbala lagi