jab unki nigahon se milin apni nigahen

jab un kī nigāhoñ se milīñ apnī nigāheñ

qadmoñ meñ simaT aa.iiñ sabhī ziist kī rāheñ

dushman se mohabbat hai tire naam kī ḳhātir

ham tujh se kareñ pyaar ki dushman se nibāheñ

dekheñ dil-e-ā.īna meñ apnā bhī sarāpā

ye bhī tirī tasvīr hai yuuñ bhī tujhe chāheñ

kyā jāniye kab paaoñ se nikle ḳhalish-e-ḳhār

kyā jāniye le jaa.eñ kahāñ dard kī rāheñ

vo gumbad-e-aflāk kā sar phoḌ rahe haiñ

duniyā meñ kahīñ bhī na milīñ jin ko panāheñ

jo hai so vahī haath meñ talvār liye hai

jab qaid the alfāz ab āzād haiñ bāheñ

ab dekh le duniyā bhī bahā-e-dil-o-dīda

jab maḳhzan-e-jāñ the tire aañsū mirī aa.heñ

jab un ki nigahon se milin apni nigahen

qadmon mein simaT aain sabhi zist ki rahen

dushman se mohabbat hai tere nam ki KHatir

hum tujh se karen pyar ki dushman se nibahen

dekhen dil-e-aina mein apna bhi sarapa

ye bhi teri taswir hai yun bhi tujhe chahen

kya jaaniye kab paon se nikle KHalish-e-KHar

kya jaaniye le jaen kahan dard ki rahen

wo gumbad-e-aflak ka sar phoD rahe hain

duniya mein kahin bhi na milin jin ko panahen

jo hai so wahi hath mein talwar liye hai

jab qaid the alfaz ab aazad hain bahen

ab dekh le duniya bhi baha-e-dil-o-dida

jab maKHzan-e-jaan the tere aansu meri aahen