ho rahat-e-jaan aur ilaj-e-gham-e-jaan tum

ho rāhat-e-jān aur 'ilāj-e-ġham-e-jāñ tum

ai jān-e-chaman jān-e-ġhazal jān-e-jahāñ tum

qātil haiñ mire abrū-o-mizhgān tumhāre

rakhte ho bhalā saath ye kyuuñ tīr-o-kamāñ tum

taqdīr tumhārī nahīñ zanjīr-e-ġhulāmī

dushvār nahīñ kuchh bhī rakho 'azm-e-javāñ tum

mumkin hai mirī jaan chalī jaa.e balā se

rakkhoge magar yaad mirā zabt-e-fuġhāñ tum

bas itnā kahā maiñ ne ki maġhrūr bahut ho

aur us ne kahā band rakho muñh meñ zabāñ tum

hai aag barābar kī lagī donoñ taraf se

be-tāb yahāñ ham haiñ to bechain vahāñ tum

maanā ki abhī bhī huuñ maiñ taqdīr kā maarā

maanā ki abhī tak ho hasīñ aur javāñ tum

mujh jaisā vafā-dār milegā na jahāñ meñ

DhūñDoge mire baa'd mujhe jaane kahāñ tum

ab maiñ bhī ḳharīdūñgā vafā pyār-o-mohabbat

khologe agar yaar kabhī dil kī dukāñ tum

hai garche nahīñ baat koī merī ġhazal meñ

dekhoge nahīñ aur kahīñ husn-e-bayāñ tum

ye sach hai ġhazal kā maiñ to ustāz nahīñ huuñ

keh degā mirā she'r kahāñ maiñ huuñ kahāñ tum

mahsūs maiñ kartā huuñ tumheñ chhū nahīñ paatā

ho koī haqīqat ki koī reg-e-ravāñ tum

afsos tumheñ hogā mire baa'd bahut par

pāoge nahīñ merā kahīñ nām-o-nishāñ tum

ho rahat-e-jaan aur 'ilaj-e-gham-e-jaan tum

ai jaan-e-chaman jaan-e-ghazal jaan-e-jahan tum

qatil hain mere abru-o-mizhgan tumhaare

rakhte ho bhala sath ye kyun tir-o-kaman tum

taqdir tumhaari nahin zanjir-e-ghulami

dushwar nahin kuchh bhi rakho 'azm-e-jawan tum

mumkin hai meri jaan chali jae bala se

rakkhoge magar yaad mera zabt-e-fughan tum

bas itna kaha main ne ki maghrur bahut ho

aur us ne kaha band rakho munh mein zaban tum

hai aag barabar ki lagi donon taraf se

be-tab yahan hum hain to bechain wahan tum

mana ki abhi bhi hun main taqdir ka mara

mana ki abhi tak ho hasin aur jawan tum

mujh jaisa wafa-dar milega na jahan mein

DhunDoge mere ba'd mujhe jaane kahan tum

ab main bhi KHaridunga wafa pyar-o-mohabbat

khologe agar yar kabhi dil ki dukan tum

hai garche nahin baat koi meri ghazal mein

dekhoge nahin aur kahin husn-e-bayan tum

ye sach hai ghazal ka main to ustaz nahin hun

keh dega mera she'r kahan main hun kahan tum

mahsus main karta hun tumhein chhu nahin pata

ho koi haqiqat ki koi reg-e-rawan tum

afsos tumhein hoga mere ba'd bahut par

paoge nahin mera kahin nam-o-nishan tum