ghairon ke dimaghon mein jalta hun to jalne do

ġhairoñ ke dimāġhoñ meñ jaltā huuñ to jalne do

ik raat to bāñhoñ meñ ye sham' pighalne do

ik roz chhaTegā hī ye dard kā bādal bhī

vādī-e-mohabbat kā mausam to badalne do

taklīf-e-karam kyuuñ do tum apne taġhāful ko

bachche haiñ tamannā.eñ bachchoñ ko machalne do

ubhreñge chaTānoñ se she'roñ ke hasīñ paikar

ehsās kī bhaTTī meñ jazboñ ko pighalne do

ye āstīñ ḳhanjar kī jāgīr nahīñ yaaro

achchhā hai agar is meñ kuchh saañp bhī palne do

bhaTkeñge abhī raahī jismoñ ke ghane ban meñ

in ghuTtī havāoñ ko kuchh ruḳh to badalne do

chhīno na abhī lazzat duzdīda tabassum kī

kuchh der khilaunoñ se ḳhvāboñ ko bahalne do

sūraj kī guphāoñ meñ jā so.egā har saaya

tanhā.ī meñ pighloge ye raat to Dhalne do

ik laash to dafnā luuñ maiñ vaqt ke dariyā meñ

ai hādso pahle to kuchh dil ko sañbhalne do

tuġhyān-e-vafā ban kar lauT aa.uuñ maiñ phir shāyad

apne se judā ho kar kuchh duur to chalne do

ye zabt ke pahre meñ zaḳhmoñ kī anā kab tak

ik chīḳh 'na.īmī' ab hoñToñ se nikalne do

ghairon ke dimaghon mein jalta hun to jalne do

ek raat to banhon mein ye sham' pighalne do

ek roz chhaTega hi ye dard ka baadal bhi

wadi-e-mohabbat ka mausam to badalne do

taklif-e-karam kyun do tum apne taghaful ko

bachche hain tamannaen bachchon ko machalne do

ubhrenge chaTanon se she'ron ke hasin paikar

ehsas ki bhaTTi mein jazbon ko pighalne do

ye aastin KHanjar ki jagir nahin yaro

achchha hai agar is mein kuchh sanp bhi palne do

bhaTkenge abhi rahi jismon ke ghane ban mein

in ghuTti hawaon ko kuchh ruKH to badalne do

chhino na abhi lazzat duzdida tabassum ki

kuchh der khilaunon se KHwabon ko bahalne do

suraj ki guphaon mein ja soega har saya

tanhai mein pighloge ye raat to Dhalne do

ek lash to dafna lun main waqt ke dariya mein

ai hadso pahle to kuchh dil ko sanbhalne do

tughyan-e-wafa ban kar lauT aaun main phir shayad

apne se juda ho kar kuchh dur to chalne do

ye zabt ke pahre mein zaKHmon ki ana kab tak

ek chiKH 'naimi' ab honTon se nikalne do