bhari bahaar mein jab phul muskuraate hain

bharī bahār meñ jab phuul muskurāte haiñ

kahāñ kahāñ tujhe dīvāne DhūñD aate haiñ

kabhī rulāte haiñ dil ko kabhī hañsāte haiñ

vo har tarah se mohabbat meñ āzmāte haiñ

tire karam kī to hai baat hī alag ai dost

tirā sitam bhī muqaddar se log paate haiñ

tumhārī ek jhalak aaj tak bhulā na sakā

kisī ko log yahāñ kaise bhuul jaate haiñ

hai intihā-e-ḳhulūs-e-vafā ki dushman ko

tirī ḳhushī ke liye ham gale lagāte haiñ

na-jāne rāhbaroñ kī samajh meñ kyā aayā

palaT ke aa.e jidhar se udhar hī jaate haiñ

lab-e-hayāt se naġhme na chhin sake gulchīñ

asīr-e-dard qafas meñ bhī gungunāte haiñ

adā-shanās-e-mohabbat 'azīz' haiñ ham log

diloñ ke raaz nigāhoñ se jaan jaate haiñ

bhari bahaar mein jab phul muskuraate hain

kahan kahan tujhe diwane DhunD aate hain

kabhi rulate hain dil ko kabhi hansate hain

wo har tarah se mohabbat mein aazmate hain

tere karam ki to hai baat hi alag ai dost

tera sitam bhi muqaddar se log pate hain

tumhaari ek jhalak aaj tak bhula na saka

kisi ko log yahan kaise bhul jate hain

hai intiha-e-KHulus-e-wafa ki dushman ko

teri KHushi ke liye hum gale lagate hain

na-jaane rahbaron ki samajh mein kya aaya

palaT ke aae jidhar se udhar hi jate hain

lab-e-hayat se naghme na chhin sake gulchin

asir-e-dard qafas mein bhi gungunate hain

ada-shanas-e-mohabbat 'aziz' hain hum log

dilon ke raaz nigahon se jaan jate hain