wo taza-dam hain nae shoabde dikhate hue

vo tāza-dam haiñ na.e sho.abde dikhāte hue

avaam thakne lage tāliyāñ bajāte hue

sambhal ke chalne kā saarā ġhurūr TuuT gayā

ik aisī baat kahī us ne laḌkhaḌāte hue

ubhārtī huī jazbāt ko ye tasvīreñ

ye inqalāb hamāre gharoñ meñ aate hue

isī liye ki kahīñ un kā qad na ghaT jaa.e

salām ko bhī vo Darte haiñ haath uThāte hue

is aadmī ne bahut qahqahe lagā.e haiñ

ye aadmī jo laraztā hai muskurāte hue

javān ho ga.ī ik nasl sunte sunte ġhazal

ham aur ho ga.e būḌhe ġhazal sunāte hue

huā ujālā to ham un ke naam bhuul ga.e

jo bujh ga.e haiñ charāġhoñ kī lau baḌhāte hue

yahī usuul hai islāh-e-hāl kā 'az.har'

ki pur-ḳhulūs hoñ ham ḳhāmiyāñ gināte hue

wo taza-dam hain nae shoabde dikhate hue

awam thakne lage taliyan bajate hue

sambhal ke chalne ka sara ghurur TuT gaya

ek aisi baat kahi us ne laDkhaDate hue

ubhaarti hui jazbaat ko ye taswiren

ye inqalab hamare gharon mein aate hue

isi liye ki kahin un ka qad na ghaT jae

salam ko bhi wo Darte hain hath uThate hue

is aadmi ne bahut qahqahe lagae hain

ye aadmi jo larazta hai muskuraate hue

jawan ho gai ek nasl sunte sunte ghazal

hum aur ho gae buDhe ghazal sunate hue

hua ujala to hum un ke nam bhul gae

jo bujh gae hain charaghon ki lau baDhate hue

yahi usul hai islah-e-haal ka 'azhar'

ki pur-KHulus hon hum KHamiyan ginate hue