wo sar-e-baam kab nahin aata

vo sar-e-bām kab nahīñ aatā

jab maiñ hotā huuñ tab nahīñ aatā

bahr-e-taskīñ vo kab nahīñ aatā

e'tibār aah ab nahīñ aatā

chup hai shikvoñ kī ek band kitāb

us se kahne kā Dhab nahīñ aatā

un ke aage bhī dil ko chain nahīñ

be-adab ko adab nahīñ aatā

zaḳhm se kam nahīñ hai us kī hañsī

jis ko ronā bhī ab nahīñ aatā

muñh ko aa jaatā hai jigar ġham se

aur gila tā-ba-lab nahīñ aatā

bholī bātoñ pe terī dil ko yaqīñ

pahle aatā thā ab nahīñ aatā

dukh vo detā hai us pe hai ye haal

lene jaatā huuñ jab nahīñ aatā

'ārzū' be-asar mohabbat chhoḌ

kyuuñ kare kaam jab nahīñ aatā

wo sar-e-baam kab nahin aata

jab main hota hun tab nahin aata

bahr-e-taskin wo kab nahin aata

e'tibar aah ab nahin aata

chup hai shikwon ki ek band kitab

us se kahne ka Dhab nahin aata

un ke aage bhi dil ko chain nahin

be-adab ko adab nahin aata

zaKHm se kam nahin hai us ki hansi

jis ko rona bhi ab nahin aata

munh ko aa jata hai jigar gham se

aur gila ta-ba-lab nahin aata

bholi baaton pe teri dil ko yaqin

pahle aata tha ab nahin aata

dukh wo deta hai us pe hai ye haal

lene jata hun jab nahin aata

'arzu' be-asar mohabbat chhoD

kyun kare kaam jab nahin aata