wo rang-e-tamanna hai ki sad-rang hua hun

vo rañg-e-tamannā hai ki sad-rañg huā huuñ

dekho to nazar huuñ jo na dekho to sadā huuñ

yā itnā subuk thā ki havā le uḌī mujh ko

yā itnā girāñ huuñ ki sar-e-rāh paḌā huuñ

chehre pe ujālā thā garebāñ meñ sahar thī

vo shaḳhs ajab thā jise raste meñ milā huuñ

kab dhuup chalī shaam Dhalī kis ko ḳhabar hai

ik umr se maiñ apne hī saa.e meñ khaḌā huuñ

jab āñdhiyāñ aa.ī haiñ to maiñ niklā na ghar se

pattoñ ke ta.āqub meñ magar dauḌ paḌā huuñ

wo rang-e-tamanna hai ki sad-rang hua hun

dekho to nazar hun jo na dekho to sada hun

ya itna subuk tha ki hawa le uDi mujh ko

ya itna giran hun ki sar-e-rah paDa hun

chehre pe ujala tha gareban mein sahar thi

wo shaKHs ajab tha jise raste mein mila hun

kab dhup chali sham Dhali kis ko KHabar hai

ek umr se main apne hi sae mein khaDa hun

jab aandhiyan aai hain to main nikla na ghar se

patton ke taaqub mein magar dauD paDa hun