wo jis ka Dar tha ki hoga guzishta sham hua

vo jis kā Dar thā ki hogā guzishta shaam huā

achānak ek ta'alluq kā iḳhtitām huā

udāsī oḌhnā ham ne sikhāyā duniyā ko

hamārī vaj.h se kaalā libās 'aam huā

us aadmī se mile the jo dard bāñTtā hai

hamārā naam liyā thā tumhārā kaam huā

ġharīb baap kā tarka thā hasratoñ kā ḳhalā

jo do tihā.ī virāsat meñ mere naam huā

vo ek shaḳhs ġhulāmī ko kar gayā mamnūn

phir ik zamāna usī shaḳhs kā ġhulām huā

pata chalā ki ka.ī mustaqil muqīm bhī haiñ

jab us ke dil meñ mirā 'ārzī qayām huā

marīz bach na sakā ḳhair jo ḳhudā kī razā

vo aspatāl ke ḳharche kā intizām huā

kisī se juḌ ke kisī kā ġhurūr toḌā 'umair'

ḳhudā ko shirk dikhāyā to jā ke raam huā

wo jis ka Dar tha ki hoga guzishta sham hua

achanak ek ta'alluq ka iKHtitam hua

udasi oDhna hum ne sikhaya duniya ko

hamari wajh se kala libas 'am hua

us aadmi se mile the jo dard banTta hai

hamara nam liya tha tumhaara kaam hua

gharib bap ka tarka tha hasraton ka KHala

jo do tihai wirasat mein mere nam hua

wo ek shaKHs ghulami ko kar gaya mamnun

phir ek zamana usi shaKHs ka ghulam hua

pata chala ki kai mustaqil muqim bhi hain

jab us ke dil mein mera 'arzi qayam hua

mariz bach na saka KHair jo KHuda ki raza

wo aspatal ke KHarche ka intizam hua

kisi se juD ke kisi ka ghurur toDa 'umair'

KHuda ko shirk dikhaya to ja ke ram hua