tamam ho chuka jab dars kaj-adai ka

tamām ho chukā jab dars kaj-adā.ī kā

to phir sabaq paḌhā lailā ne bevafā.ī kā

shab-e-visāl yahī sochtā huuñ shaam se maiñ

ḳhudā hī ḳhair kare kal hai din judā.ī kā

paTak paTak ke sar us dar pe kahte haiñ 'āshiq

yahī maqām hai taqdīr-āzmā.ī kā

ġhazab thā qahr thā ai nāznīñ ba-vaqt-e-zab.h

nigāh phirte hī muḌnā tirī kalā.ī kā

'ajab nahīñ hai ki pahroñ baḌhe visāl kī raat

karūñ jo zikr ghaḌī-bhar shab-e-judā.ī kā

qafas se duur chaman se qarīb ho bulbul

bañdhe ḳhayāl asīrī meñ yuuñ rihā.ī kā

lagan hai taḳht dhuāñ hai chañvar to sho'la taaj

muqir hai sham' har ik terī bādshā.ī kā

mire makān meñ aa kar siyāh hotī hai sham'

jo ghertā hai añdherā shab-e-judā.ī kā

zarar se bhī ho na mujh mai-kash-e-faqīr ko ranj

subū jo TuuTe to kaasa bane gadā.ī kā

mushā'ire meñ haiñ fāḳhir ke jam' ahl-e-suḳhan

yahīñ hai lutf 'fasāhat' ġhazal-sarā.ī kā

tamam ho chuka jab dars kaj-adai ka

to phir sabaq paDha laila ne bewafai ka

shab-e-visal yahi sochta hun sham se main

KHuda hi KHair kare kal hai din judai ka

paTak paTak ke sar us dar pe kahte hain 'ashiq

yahi maqam hai taqdir-azmai ka

ghazab tha qahr tha ai naznin ba-waqt-e-zabh

nigah phirte hi muDna teri kalai ka

'ajab nahin hai ki pahron baDhe visal ki raat

karun jo zikr ghaDi-bhar shab-e-judai ka

qafas se dur chaman se qarib ho bulbul

bandhe KHayal asiri mein yun rihai ka

lagan hai taKHt dhuan hai chanwar to sho'la taj

muqir hai sham' har ek teri baadshai ka

mere makan mein aa kar siyah hoti hai sham'

jo gherta hai andhera shab-e-judai ka

zarar se bhi ho na mujh mai-kash-e-faqir ko ranj

subu jo TuTe to kasa bane gadai ka

musha'ire mein hain faKHir ke jam' ahl-e-suKHan

yahin hai lutf 'fasahat' ghazal-sarai ka