sar-e-tur jalne wala jo na ek sharar hota

sar-e-tūr jalne vaalā jo na ik sharār hotā

to kalām-e-lan-tarānī kahāñ āshkār hotā

ye kamāl-e-maslahat hai ki chhupā hai vo nazar se

jo vo be-naqāb hotā to jahāñ ġhubār hotā

ye hijāb-e-'aql haTtā to visāl-e-yār miltā

jo ye vahm-e-ḳhuld miTtā to na intizār hotā

rah-e-mā'rifat ne mujh ko vo maqām-e-ḳhās baḳhshā

jo anā ko maiñ na khotā to zalīl-o-ḳhvār hotā

maiñ vo qatra huuñ ki jis ko milī vus'at-e-samundar

jo anā kī had meñ rahtā to bas ek dhaar hotā

maiñ 'adam se kyā chalā thā ki vujūd hī hai aafat

jo na maiñ numūd hotā to na sog-vār hotā

ye jo zohd kā hai dā'vā ye to maslahat hai dil kī

jo gunāh meñ mazā thā vo na āshkār hotā

usī āstāñ pe 'rāshid' milā tāj-e-pādshāhī

jo ḳhudā kā dar na miltā to kahāñ qarār hotā

sar-e-tur jalne wala jo na ek sharar hota

to kalam-e-lan-tarani kahan aashkar hota

ye kamal-e-maslahat hai ki chhupa hai wo nazar se

jo wo be-naqab hota to jahan ghubar hota

ye hijab-e-'aql haTta to visal-e-yar milta

jo ye wahm-e-KHuld miTta to na intizar hota

rah-e-ma'rifat ne mujh ko wo maqam-e-KHas baKHsha

jo ana ko main na khota to zalil-o-KHwar hota

main wo qatra hun ki jis ko mili wus'at-e-samundar

jo ana ki had mein rahta to bas ek dhaar hota

main 'adam se kya chala tha ki wujud hi hai aafat

jo na main numud hota to na sog-war hota

ye jo zohd ka hai da'wa ye to maslahat hai dil ki

jo gunah mein maza tha wo na aashkar hota

usi aastan pe 'rashid' mila taj-e-padshahi

jo KHuda ka dar na milta to kahan qarar hota