sahra nikal dun kabhi dariya nikal dun

sahrā nikāl duuñ kabhī dariyā nikāl duuñ

ye mujh pe hai ki aañkh se kab kyā nikāl duuñ

itnī baḌī qatār meñ 'ujlat bhī hai tujhe

gar tū kahe to dūsrā rasta nikāl duuñ

chhū kar kahīñ se aur kahīñ chuum kar tujhe

aa jā tire badan kā maiñ sadqa nikāl duuñ

dast-e-hunar ko bosa-e-jānāñ agar mile

maiñ ko.ele kī kaan se hiirā nikāl duuñ

tū mustaqil gayā hai so mumkin hai ab kī baar

mujh meñ shumūl terā maiñ hissa nikāl duuñ

'hassām' tum bhī us kī zabāñ bolne lage

aisā na ho maiñ tum pe hī ġhussa nikāl duuñ

sahra nikal dun kabhi dariya nikal dun

ye mujh pe hai ki aankh se kab kya nikal dun

itni baDi qatar mein 'ujlat bhi hai tujhe

gar tu kahe to dusra rasta nikal dun

chhu kar kahin se aur kahin chum kar tujhe

aa ja tere badan ka main sadqa nikal dun

dast-e-hunar ko bosa-e-jaanan agar mile

main koele ki kan se hira nikal dun

tu mustaqil gaya hai so mumkin hai ab ki bar

mujh mein shumul tera main hissa nikal dun

'hassam' tum bhi us ki zaban bolne lage

aisa na ho main tum pe hi ghussa nikal dun