gulshan ko rang chand ko zebai de gaya

gulshan ko rang chāñd ko zebā.ī de gayā

ik shaḳhs shahr ko mire rā'nā.ī de gayā

lamhoñ meñ ḳhatm ho ga.e rishte bahār ke

TuuTā jo phuul shāḳh ko tanhā.ī de gayā

rātoñ kī niiñd ruuh kī taskīn chhīn kar

is dil ko dard dard ko gahrā.ī de gayā

kuchh is tarah judā huā is baar mujh se vo

mujh ko tamām 'umr kī tanhā.ī de gayā

kartā rahā vo dhuup meñ saa.e kī justujū

jaise ki zindagī ko shanāsā.ī de gayā

itne girāñ haiñ guzre vo lamhe visāl ke

aise milā 'qamar' ko vo gahnā.ī de gayā

gulshan ko rang chand ko zebai de gaya

ek shaKHs shahr ko mere ra'nai de gaya

lamhon mein KHatm ho gae rishte bahaar ke

TuTa jo phul shaKH ko tanhai de gaya

raaton ki nind ruh ki taskin chhin kar

is dil ko dard dard ko gahrai de gaya

kuchh is tarah juda hua is bar mujh se wo

mujh ko tamam 'umr ki tanhai de gaya

karta raha wo dhup mein sae ki justuju

jaise ki zindagi ko shanasai de gaya

itne giran hain guzre wo lamhe visal ke

aise mila 'qamar' ko wo gahnai de gaya