dil se us but ke qamar qadr-e-wafa jati rahi

dil se us but ke qamar qadr-e-vafā jaatī rahī

jis havā meñ aap haiñ ab vo havā jaatī rahī

qadr-e-ulfat jab nahīñ yā-rab to ulfat bhī na ho

vo maraz kyuuñ rah gayā jis kī davā jaatī rahī

jins-e-dil mujh ḳhasta-jāñ kī yā shikāyat ġhair kī

aap ne kis chiiz ko hañs kar kahā jaatī rahī

ye havā kaisī chalī yā-rab ki bāġh-e-dahr meñ

phuul baaqī rah ga.ī bū-e-vafā jaatī rahī

haath kyoñ malte ho qatl-e-'āshiq-e-jāñbāz par

phir kahoge shoḳhī-e-rang-e-hinā jaatī rahī

mere bahlāne ko un kī minnatoñ ko hijr meñ

hichkiyāñ aatī rahīñ āh-e-rasā jaatī rahī

vasl-e-jānāñ kī ḳhushī kā ai 'qamar' kyā e'tibār

bārhā qismat meñ aa.ī bār-hā jaatī rahī

dil se us but ke qamar qadr-e-wafa jati rahi

jis hawa mein aap hain ab wo hawa jati rahi

qadr-e-ulfat jab nahin ya-rab to ulfat bhi na ho

wo maraz kyun rah gaya jis ki dawa jati rahi

jins-e-dil mujh KHasta-jaan ki ya shikayat ghair ki

aap ne kis chiz ko hans kar kaha jati rahi

ye hawa kaisi chali ya-rab ki bagh-e-dahr mein

phul baqi rah gai bu-e-wafa jati rahi

hath kyon malte ho qatl-e-'ashiq-e-jaanbaz par

phir kahoge shoKHi-e-rang-e-hina jati rahi

mere bahlane ko un ki minnaton ko hijr mein

hichkiyan aati rahin aah-e-rasa jati rahi

wasl-e-jaanan ki KHushi ka ai 'qamar' kya e'tibar

barha qismat mein aai bar-ha jati rahi