did ko tarsi nigahon pe huwaida ho jae

diid ko tarsī nigāhoñ pe huvaidā ho jaa.e

parda-e-ġhaib uThā de koī chehra ho jaa.e

mustaqil is meñ basā.eñge tumheñ jān-e-murād

dil zarā dard se kuchh aur shanāsā ho jaa.e

ḳhvāhish-e-raqs-e-junūñ aur dabā.eñ kab tak

pā-ba-jaulāñ hī sahī aaj tamāshā ho jaa.e

harf aatā hai to aa.e mirī timsāloñ par

ġhair-mumkin hai koī shahr meñ tujh sā ho jaa.e

us se milne nahīñ detī hai anā kī dīvār

ye kisī roz girā duuñ to vo merā ho jaa.e

havas-e-dīd hī āñkhoñ meñ nahīñ jab baaqī

kyā 'ajab hai ki jo dil bhī kabhī sahrā ho jaa.e

did ko tarsi nigahon pe huwaida ho jae

parda-e-ghaib uTha de koi chehra ho jae

mustaqil is mein basaenge tumhein jaan-e-murad

dil zara dard se kuchh aur shanasa ho jae

KHwahish-e-raqs-e-junun aur dabaen kab tak

pa-ba-jaulan hi sahi aaj tamasha ho jae

harf aata hai to aae meri timsalon par

ghair-mumkin hai koi shahr mein tujh sa ho jae

us se milne nahin deti hai ana ki diwar

ye kisi roz gira dun to wo mera ho jae

hawas-e-did hi aankhon mein nahin jab baqi

kya 'ajab hai ki jo dil bhi kabhi sahra ho jae