munh chiDane lage dar-o-diwar

muñh chiḌāne lage dar-o-dīvār

ab koī ghar ho be-dar-o-dīvār

zaḳhm ubhre ki koī naqsh banā

kyā se kyā ho gaye dar-o-dīvār

ik kiran raushnī kī pā na sake

rauzan-e-sub.h se dar-o-dīvār

ab vo yādoñ ke silsile bhī nahīñ

kitne tanhā hue dar-o-dīvār

ik zamāna huā mile bhī nahīñ

mauja-e-rang se dar-o-dīvār

'umr bhar ghar basāne vaale kī

raah dekhā kiye dar-o-dīvār

yaañ ḳharābī ne kuchh nahīñ chhoḌā

be-kasī aur mire dar-o-dīvār

aa.ī dil ko bhī raas vīrānī

vaise kuchh kam na the dar-o-dīvār

munh chiDane lage dar-o-diwar

ab koi ghar ho be-dar-o-diwar

zaKHm ubhre ki koi naqsh bana

kya se kya ho gaye dar-o-diwar

ek kiran raushni ki pa na sake

rauzan-e-subh se dar-o-diwar

ab wo yaadon ke silsile bhi nahin

kitne tanha hue dar-o-diwar

ek zamana hua mile bhi nahin

mauja-e-rang se dar-o-diwar

'umr bhar ghar basane wale ki

rah dekha kiye dar-o-diwar

yan KHarabi ne kuchh nahin chhoDa

be-kasi aur mere dar-o-diwar

aai dil ko bhi ras virani

waise kuchh kam na the dar-o-diwar