jab kabhi tanqid ki hai mauja-e-girdab par

jab kabhī tanqīd kī hai mauja-e-girdāb par

saiñkaḌoñ shikneñ ubhar aa.iiñ jabīn-e-āb par

kāñpte haiñ raat ke parde meñ kyuuñ kirnoñ ke haath

daaġh ye kis ne lagāyā chādar-e-mahtāb par

aa.ī hai jangal ke phūloñ se mujhe bū-e-vafā

mar miTā huuñ maiñ to is vīrānī-e-shādāb par

baat kī mujh se na dil de kar kabhī ahbāb ne

maiñ ne dhoke khaa.e haiñ farmā.ish-e-ahbāb par

raakh kā ik Dher ban kar rah gayā siine meñ dil

aag barsātī rahī duniyā mire ā'sāb par

khil chale the rafta rafta mujh pe kuchh asrār-e-shab

pher dī ġham ne siyāhī dīda-e-be-ḳhvāb par

hai mire qadmoñ ke nīche se zamīñ niklī huī

chal rahā huuñ vaqt ke baḌhte hue sailāb par

yuuñ 'muzaffar' aaj un palkoñ pe aañsū aa ga.e

jis tarah jalte diye peshānī-e-mehrāb par

jab kabhi tanqid ki hai mauja-e-girdab par

sainkaDon shiknen ubhar aain jabin-e-ab par

kanpte hain raat ke parde mein kyun kirnon ke hath

dagh ye kis ne lagaya chadar-e-mahtab par

aai hai jangal ke phulon se mujhe bu-e-wafa

mar miTa hun main to is virani-e-shadab par

baat ki mujh se na dil de kar kabhi ahbab ne

main ne dhoke khae hain farmaish-e-ahbab par

rakh ka ek Dher ban kar rah gaya sine mein dil

aag barsati rahi duniya mere aa'sab par

khil chale the rafta rafta mujh pe kuchh asrar-e-shab

pher di gham ne siyahi dida-e-be-KHwab par

hai mere qadmon ke niche se zamin nikli hui

chal raha hun waqt ke baDhte hue sailab par

yun 'muzaffar' aaj un palkon pe aansu aa gae

jis tarah jalte diye peshani-e-mehrab par