wasl mein zikr ghair ka na karo

vasl meñ zikr ġhair kā na karo

ḳhush kiyā hai to phir ḳhafā na karo

zulfoñ par mujh ko shefta na karo

in balāoñ meñ mubtalā na karo

merī itnī to baat maano bhalā

baat aġhyār se kiyā na karo

milne dūñgā na ġhair se tum ko

karo mujh se milāp yā na karo

mar bhī jā.ūñ kahīñ ye rog miTe

ai tabīboñ mirī davā na karo

muñh chhupānā hī hai agar manzūr

mere āñkhoñ-tale phirā na karo

ai gul in dinoñ ro.o.ge

khilkhilā kar bahut hañsā na karo

bosa lene do kuchh to ho taqsīr

hadaf-e-tīr be-ḳhatā na karo

jaan sadqe karūñ jo qadr karo

dil tumheñ duuñ agar daġhā na karo

kabhī fariyādtan suno merī

kaun kahtā hai tum jafā na karo

ġhair par kyuuñ nigāh karte ho

mujh ko is tiir kā nishāna karo

do-ghaḌī ke liye ham aa.e haiñ

talḳh bātoñ se be-mazā na karo

ek purze pe likh ke ye do-harf

dosto yaar ko ravāna karo

jald aao ki dam nikaltā hai

mujh ko piiTo agar bahāna karo

'bahr' shākir raho muqaddar par

kas-o-nā-kas se iltijā na karo

wasl mein zikr ghair ka na karo

KHush kiya hai to phir KHafa na karo

zulfon par mujh ko shefta na karo

in balaon mein mubtala na karo

meri itni to baat mano bhala

baat aghyar se kiya na karo

milne dunga na ghair se tum ko

karo mujh se milap ya na karo

mar bhi jaun kahin ye rog miTe

ai tabibon meri dawa na karo

munh chhupana hi hai agar manzur

mere aankhon-tale phira na karo

ai gul in dinon rooge

khilkhila kar bahut hansa na karo

bosa lene do kuchh to ho taqsir

hadaf-e-tir be-KHata na karo

jaan sadqe karun jo qadr karo

dil tumhein dun agar dagha na karo

kabhi fariyaadtan suno meri

kaun kahta hai tum jafa na karo

ghair par kyun nigah karte ho

mujh ko is tir ka nishana karo

do-ghaDi ke liye hum aae hain

talKH baaton se be-maza na karo

ek purze pe likh ke ye do-harf

dosto yar ko rawana karo

jald aao ki dam nikalta hai

mujh ko piTo agar bahana karo

'bahr' shakir raho muqaddar par

kas-o-na-kas se iltija na karo