wasf-e-jamal-e-zauq hai ahl-e-nigah ka

vasf-e-jamāl-e-zauq hai ahl-e-nigāh kā

hairat kahūñ ki shor kahūñ vaah vaah kā

ahl-e-junūñ pe zulm hai pābandī-e-rusūm

jaada hamāre vāste kāñTā hai raah kā

rakhtā hai talḳh-kām ġham-e-lazzat-e-jahāñ

kyā kījiye ki lutf nahīñ kuchh gunāh kā

kyā kuchh janāb-e-shaiḳh kī niyyat se thā ba.iid

mauqa.a bhī duḳht-e-raz ne diyā ho gunāh kā

ai barq kab se ik nazar-e-garm ke liye

ātash-bajāñ hai dasht meñ tinkā giyāh kā

hañgāma-e-hayāt se lenā to kuchh nahīñ

haañ dekhte chalo ki tamāshā hai raah kā

maiñ hāsil-e-nazar huuñ tamannā-e-dīd meñ

letā huuñ kaam har bun-e-mū se nigāh kā

'nātiq' gila-pasand hai tū ġham-jafā-pasand

ai dād-ḳhvāh kaam hai be-dād-ḳhvāh kā

wasf-e-jamal-e-zauq hai ahl-e-nigah ka

hairat kahun ki shor kahun wah wah ka

ahl-e-junun pe zulm hai pabandi-e-rusum

jada hamare waste kanTa hai rah ka

rakhta hai talKH-kaam gham-e-lazzat-e-jahan

kya kijiye ki lutf nahin kuchh gunah ka

kya kuchh janab-e-shaiKH ki niyyat se tha baid

mauqa bhi duKHt-e-raz ne diya ho gunah ka

ai barq kab se ek nazar-e-garm ke liye

aatash-bajaan hai dasht mein tinka giyah ka

hangama-e-hayat se lena to kuchh nahin

han dekhte chalo ki tamasha hai rah ka

main hasil-e-nazar hun tamanna-e-did mein

leta hun kaam har bun-e-mu se nigah ka

'natiq' gila-pasand hai tu gham-jafa-pasand

ai dad-KHwah kaam hai be-dad-KHwah ka