wadon hi pe har roz meri jaan na Talo

vā'doñ hī pe har roz mirī jaan na Taalo

hai 'iid kā din ab to gale ham ko lagā lo

har vaqt miyāñ ḳhuub nahīñ gāliyāñ denī

kyā bakte ho tum yaava zabāñ apnī sañbhālo

pahuñche ko chhuḌāoge baḌe mard ho aise

tum pahle mire haath se dāman to chhuḌā lo

dīvāne kā hai tere ye 'ālam ki parī bhī

dekh us ko ye kahtī hai koī us ko bulā lo

is shoḳh kī āñkhoñ ke jo jaatā huuñ muqābil

kahtī haiñ nigāheñ ki use maar hī Daalo

yuuñ phirte ho maqtal pe shahīdān-e-vafā ke

dāman to zarā haath meñ tum apne uThā lo

jaañ Dāltā hai 'mus.hafī' qālib meñ suḳhan ke

mushkil hai ki tum us kī tarah she’r to Dhālo

kū zamzama-e-dehli o kū lahja-e-pūrab

kyuuñ us kī taraf hote ho nāhaq ko razālo

wa'don hi pe har roz meri jaan na Talo

hai 'id ka din ab to gale hum ko laga lo

har waqt miyan KHub nahin galiyan deni

kya bakte ho tum yawa zaban apni sanbhaalo

pahunche ko chhuDaoge baDe mard ho aise

tum pahle mere hath se daman to chhuDa lo

diwane ka hai tere ye 'alam ki pari bhi

dekh us ko ye kahti hai koi us ko bula lo

is shoKH ki aankhon ke jo jata hun muqabil

kahti hain nigahen ki use mar hi Dalo

yun phirte ho maqtal pe shahidan-e-wafa ke

daman to zara hath mein tum apne uTha lo

jaan Dalta hai 'mushafi' qalib mein suKHan ke

mushkil hai ki tum us ki tarah she’r to Dhaalo

ku zamzama-e-dehli o ku lahja-e-purab

kyun us ki taraf hote ho nahaq ko razalo