tum KHwab ki diwar gira kyun nahin dete

tum ḳhvāb kī dīvār girā kyuuñ nahīñ dete

soī huī huuñ mujh ko jagā kyuuñ nahīñ dete

ye gard jo ḳhvāhish ke darīchoñ pe paḌī hai

is dhund meñ tum phuul khilā kyuuñ nahīñ dete

Tahnī huuñ to aane do mirā rang bhī mujh par

chiḌiyā huuñ to phir mujh ko uḌā kyuuñ nahīñ dete

mālik ho to phir dil meñ dhaḌakne chale aao

haikal ho to kāhin ko sadā kyuuñ nahīñ dete

kyā hai jo tire bas meñ tasarruf meñ nahīñ hai

ummīd kī sham'oñ ko jalā kyuuñ nahīñ dete

bhīgī huī āñkheñ haiñ to kholo inheñ mujh par

ghultā huā dil hai to du'ā kyuuñ nahīñ dete

tum KHwab ki diwar gira kyun nahin dete

soi hui hun mujh ko jaga kyun nahin dete

ye gard jo KHwahish ke darichon pe paDi hai

is dhund mein tum phul khila kyun nahin dete

Tahni hun to aane do mera rang bhi mujh par

chiDiya hun to phir mujh ko uDa kyun nahin dete

malik ho to phir dil mein dhaDakne chale aao

haikal ho to kahin ko sada kyun nahin dete

kya hai jo tere bas mein tasarruf mein nahin hai

ummid ki sham'on ko jala kyun nahin dete

bhigi hui aankhen hain to kholo inhen mujh par

ghulta hua dil hai to du'a kyun nahin dete