qaza se bhi na bujha ‘ishq-o-agahi ka charagh

qazā se bhī na bujhā ‘ishq-o-āgahī kā charāġh

mire lahū se jalā merī zindagī kā charāġh

ulajh rahī hai siyāhī se raushnī kī lakīr

ye dushmanī kā dhuāñ hai vo raushnī kā charāġh

in āñdhiyoñ kā bagūloñ kā kyā gila kiije

jab aadmī hī bujhātā ho aadmī kā charāġh

ye kis dayār se aa.ī hai raftagāñ kī sadā

hañsī tamām huī gul huā ḳhushī kā charāġh

kis aane vaale musāfir ke intizār meñ haiñ

zamāne bhar kī nigāheñ tirī galī kā charāġh

diye bujhe haiñ to kyā zau-fishāñ hai māh-e-tamām

tumhāre bas meñ nahīñ hai ye chāñdnī kā charāġh

baḌhāo haath karo tez raushnī yaaro

tumhāre sāmne rakkhā hai zindagī kā charāġh

isī se shams-o-qamar kasb-e-nūr karte haiñ

mirī nazar meñ farozāñ hai mere jī kā charāġh

baġhair ḳhūn-e-tamannā ba-juz ḳhulūs-e-nazar

'jamīl' jal nahīñ saktā ḳhud-āgahī kā charāġh

qaza se bhi na bujha ‘ishq-o-agahi ka charagh

mere lahu se jala meri zindagi ka charagh

ulajh rahi hai siyahi se raushni ki lakir

ye dushmani ka dhuan hai wo raushni ka charagh

in aandhiyon ka bagulon ka kya gila kije

jab aadmi hi bujhata ho aadmi ka charagh

ye kis dayar se aai hai raftagan ki sada

hansi tamam hui gul hua KHushi ka charagh

kis aane wale musafir ke intizar mein hain

zamane bhar ki nigahen teri gali ka charagh

diye bujhe hain to kya zau-fishan hai mah-e-tamam

tumhaare bas mein nahin hai ye chandni ka charagh

baDhao hath karo tez raushni yaro

tumhaare samne rakkha hai zindagi ka charagh

isi se shams-o-qamar kasb-e-nur karte hain

meri nazar mein farozan hai mere ji ka charagh

baghair KHun-e-tamanna ba-juz KHulus-e-nazar

'jamil' jal nahin sakta KHud-agahi ka charagh