qadr kije aap ka suraj abhi Duba nahin

qadr kiije aap kā sūraj abhī Duubā nahīñ

varna Duubā jis kā sūraj phir kabhī niklā nahīñ

zarra zarra aa.ina thā aur bīnā.ī bhī thī

husn bhī thā mujh meñ kuchh lekin kabhī dekhā nahīñ

ye na samjheñ aap kī bāteñ thiiñ bilkul be-asar

kaT gayā thā dil agarche aañkh se Tapkā nahīñ

aarzū gul kī thī dil meñ ḳhaar se Darte bhī haiñ

ye faqat ḳhvāhish thī dil kī faisla dil kā nahīñ

zindagī tārīk se tārīk-tar hotī ga.ī

terī chāhat thī ki merā hausla TuuTā nahīñ

āshnāoñ meñ to ham ne ajnabiyyat dekh lī

ajnabī logoñ meñ lekin āshnā dekhā nahīñ

vaqt-e-fursat meñ bhī 'aḳhtar' sab ke sab masrūf haiñ

sochtā huuñ dard-e-dil apnā sunā.ūñ yā nahīñ

qadr kije aap ka suraj abhi Duba nahin

warna Duba jis ka suraj phir kabhi nikla nahin

zarra zarra aaina tha aur binai bhi thi

husn bhi tha mujh mein kuchh lekin kabhi dekha nahin

ye na samjhen aap ki baaten thin bilkul be-asar

kaT gaya tha dil agarche aankh se Tapka nahin

aarzu gul ki thi dil mein KHar se Darte bhi hain

ye faqat KHwahish thi dil ki faisla dil ka nahin

zindagi tarik se tarik-tar hoti gai

teri chahat thi ki mera hausla TuTa nahin

aashnaon mein to hum ne ajnabiyyat dekh li

ajnabi logon mein lekin aashna dekha nahin

waqt-e-fursat mein bhi 'aKHtar' sab ke sab masruf hain

sochta hun dard-e-dil apna sunaun ya nahin