jo sochta hun agar wo bayan ho jae

jo sochtā huuñ agar vo bayān ho jaa.e

to paanī paanī ye saarā jahān ho jaa.e

gila hai aañkh se un ko zabān se hai gila

qalam ko hukm hai vo be-zabān ho jaa.e

vahāñ pe rāsta hijrat hī sirf hotā hai

jahāñ zamīn ye ḳhud āsmān ho jaa.e

tū ḳhud hī soch zarā haal us gulistāñ kā

ḳhizāñ ke saath jahāñ bāġhbān ho jaa.e

kahāñ talak bhalā utre koī umīdoñ par

ki saañs saañs jahāñ imtihān ho jaa.e

yuuñ ḳhatm hotā hai kirdār baar baar mirā

ki ḳhatm biich meñ hī dāstān ho jaa.e

añdherī raat sadā de rahī hai āñdhī ko

hai phir bhī zid ki diyā ḳhush-gumān ho jaa.e

maiñ vo diyā huuñ jo sūraj kī soch sochtā hai

jo chāhtā hai ki raushan jahān ho jaa.e

zamāna laakh burā chāhe ḳhvāb toḌe magar

ḳhudā se kaise koī bad-gumān ho jaa.e

maiñ kaise maan luuñ us ko burā yahāñ 'abrak'

ḳhilāf jis ke jahāñ yak-zabān ho jaa.e

jo sochta hun agar wo bayan ho jae

to pani pani ye sara jahan ho jae

gila hai aankh se un ko zaban se hai gila

qalam ko hukm hai wo be-zaban ho jae

wahan pe rasta hijrat hi sirf hota hai

jahan zamin ye KHud aasman ho jae

tu KHud hi soch zara haal us gulistan ka

KHizan ke sath jahan baghban ho jae

kahan talak bhala utre koi umidon par

ki sans sans jahan imtihan ho jae

yun KHatm hota hai kirdar bar bar mera

ki KHatm bich mein hi dastan ho jae

andheri raat sada de rahi hai aandhi ko

hai phir bhi zid ki diya KHush-guman ho jae

main wo diya hun jo suraj ki soch sochta hai

jo chahta hai ki raushan jahan ho jae

zamana lakh bura chahe KHwab toDe magar

KHuda se kaise koi bad-guman ho jae

main kaise man lun us ko bura yahan 'abrak'

KHilaf jis ke jahan yak-zaban ho jae