dariya bhi jo mile mujhe pyasa dikhai de
dariyā bhī jo mile mujhe pyāsā dikhā.ī de
sūraj bhī paas ho to añdherā dikhā.ī de
maazī ke aa.ine ko na toḌo kabhī kabhī
būḌhā bhī chāhtā hai ki bachchā dikhā.ī de
har rāste meñ rāhbaroñ kā hai vo hujūm
rah-rau haiñ muntazir koī rastā dikhā.ī de
begāngī kā zahr vo phailā hai chaar sū
mahfil meñ bhī har ek akelā dikhā.ī de
is tarh tū na mere qafas ko chaman meñ Taañg
jo āshiyāñ in āñkhoñ ko jaltā dikhā.ī de
ye mo'jiza nahīñ tirī himmat kī baat hai
tūfāñ meñ bhī jo tujh ko kinārā dikhā.ī de
kyā ye nizām-e-nau tirī qudrat se duur hai
ham rang-o-bū ko sun sakeñ naġhma dikhā.ī de
har hādse kā dosto hai ik yahī javāb
āñkhoñ meñ ashk bhī hoñ to hañstā dikhā.ī de
kaise kahūñ vo baat ki hai aañch is qadar
hoñToñ pe harf harf pighaltā dikhā.ī de
patthar bhī pheñkte chalo dariyā meñ saath saath
auroñ ko to na 'aks tumhārā dikhā.ī de
āñkhoñ meñ kab se ashk liye phir rahā huuñ maiñ
shāyad kisī jagah koī apnā dikhā.ī de
pathrā diye haiñ vaqt ne āñkhoñ ke aa.ine
chehroñ kī bhiiḌ bhī ho to ab kyā dikhā.ī de
TukḌoñ ko aa.ine ke zarā dekh joḌ kar
shāyad gumā huā koī chehrā dikhā.ī de
patthar kī aur Daal do chādar bhī laash par
aisā na ho kafan meñ barahna dikhā.ī de
jo rāh-e-roz-o-shab meñ hai sadiyoñ se ham-safar
kyā zulm hai vo ab bhī parāyā dikhā.ī de
jab 'aish ho to dost 'na.īmī' ke saikḌoñ
ġham kā savāl aa.e to tanhā dikhā.ī de
dariya bhi jo mile mujhe pyasa dikhai de
suraj bhi pas ho to andhera dikhai de
mazi ke aaine ko na toDo kabhi kabhi
buDha bhi chahta hai ki bachcha dikhai de
har raste mein rahbaron ka hai wo hujum
rah-rau hain muntazir koi rasta dikhai de
begangi ka zahr wo phaila hai chaar su
mahfil mein bhi har ek akela dikhai de
is tarh tu na mere qafas ko chaman mein Tang
jo aashiyan in aankhon ko jalta dikhai de
ye mo'jiza nahin teri himmat ki baat hai
tufan mein bhi jo tujh ko kinara dikhai de
kya ye nizam-e-nau teri qudrat se dur hai
hum rang-o-bu ko sun saken naghma dikhai de
har hadse ka dosto hai ek yahi jawab
aankhon mein ashk bhi hon to hansta dikhai de
kaise kahun wo baat ki hai aanch is qadar
honTon pe harf harf pighalta dikhai de
patthar bhi phenkte chalo dariya mein sath sath
auron ko to na 'aks tumhaara dikhai de
aankhon mein kab se ashk liye phir raha hun main
shayad kisi jagah koi apna dikhai de
pathra diye hain waqt ne aankhon ke aaine
chehron ki bhiD bhi ho to ab kya dikhai de
TukDon ko aaine ke zara dekh joD kar
shayad guma hua koi chehra dikhai de
patthar ki aur Dal do chadar bhi lash par
aisa na ho kafan mein barahna dikhai de
jo rah-e-roz-o-shab mein hai sadiyon se ham-safar
kya zulm hai wo ab bhi paraya dikhai de
jab 'aish ho to dost 'naimi' ke saikDon
gham ka sawal aae to tanha dikhai de
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
