ai kash puri ye dil ki umang ho jae

ai kaash puurī ye dil kī umang ho jaa.e

maiñ jis meñ rahtā huuñ vo shahr jhang ho jaa.e

flash seep Dakaitī bluff to khel chuke

zarā sī der ko ab aao rang ho jaa.e

mu'āmalāt ko ham guftugū se tai kar leñ

vo is se pahle ki donoñ meñ jang ho jaa.e

mubālaġha nahīñ ye ik aTal haqīqat hai

jo us ko dekh le us kā malang ho jaa.e

satā na un ko agar vo jalāl meñ aa.e

hayāt bojh zamīñ tujh pe tang ho jaa.e

maiñ tujh se bichhḌā to 'nahrīr' 'ain mumkin hai

ye ziist merī kaTī ik patang ho jaa.e

ai kash puri ye dil ki umang ho jae

main jis mein rahta hun wo shahr jhang ho jae

flash seep Dakaiti bluff to khel chuke

zara si der ko ab aao rang ho jae

mu'amalat ko hum guftugu se tai kar len

wo is se pahle ki donon mein jang ho jae

mubaalagha nahin ye ek aTal haqiqat hai

jo us ko dekh le us ka malang ho jae

sata na un ko agar wo jalal mein aae

hayat bojh zamin tujh pe tang ho jae

main tujh se bichhDa to 'nahrir' 'ain mumkin hai

ye zist meri kaTi ek patang ho jae