ajab si uljhanon ka samna hai
'ajab sī uljhanoñ kā sāmnā hai
vafā ke silsiloñ kā sāmnā hai
charāġhoñ kī sajī lambī qatāro
hameñ kuchh āñdhiyoñ kā sāmnā hai
na-jāne dushmanoñ ke shahr meñ kyuuñ
purāne dostoñ kā sāmnā hai
mirī āñkhoñ se nīñdeñ uḌ chukī haiñ
mujhe kuchh ḳhvāhishoñ kā sāmnā hai
badan hai kāñch kā merā so mujh ko
musalsal pattharoñ kā sāmnā hai
abhī mujh se gurezāñ hai muqaddar
abhī kuchh hādsoñ kā sāmnā hai
barastī bārishoñ kī hai kahānī
havā ko āñsuoñ kā sāmnā hai
abhī kuchh ḳhvāb haiñ āñkhoñ maiñ 'zobī'
abhī kuchh rat-jagoñ kā sāmnā hai
'ajab si uljhanon ka samna hai
wafa ke silsilon ka samna hai
charaghon ki saji lambi qataro
hamein kuchh aandhiyon ka samna hai
na-jaane dushmanon ke shahr mein kyun
purane doston ka samna hai
meri aankhon se ninden uD chuki hain
mujhe kuchh KHwahishon ka samna hai
badan hai kanch ka mera so mujh ko
musalsal pattharon ka samna hai
abhi mujh se gurezan hai muqaddar
abhi kuchh hadson ka samna hai
barasti barishon ki hai kahani
hawa ko aansuon ka samna hai
abhi kuchh KHwab hain aankhon main 'zobi'
abhi kuchh rat-jagon ka samna hai
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
