اگ رہا ہے در و دیوار پہ سبزہ غالبؔ (ردیف .. ے)

اگ رہا ہے در و دیوار پہ سبزہ غالبؔ

ہم بیاباں میں ہیں اور گھر میں بہار آئی ہے

فرصت آئینۂ صد رنگ خود آرائی ہے

روز و شب یک کف افسوس تماشائی ہے

وحشت زخم وفا دیکھ کہ سر تا سر دل

بخیہ جوں جوہر تیغ آفت گیرائی ہے

شمع آسا چہ سر دعویٰ و کو پاۓ ثبات

گل صد شعلہ بہ یک جیب شکیبائی ہے

نالۂ خونیں ورق و دل گل مضمون شفق

چمن آرائے نفس وحشت تنہائی ہے

بوئے گل فتنۂ بیدار و چمن جامۂ خواب

وصل بر رنگ تپش کسوت رسوائی ہے

شرم طوفان خزاں رنگ طرب گاہ بہار

ماہتابی بکف چشم تماشائی ہے

باغ خاموشیٔ دل سے سخن عشق اسدؔ

نفس سوختہ رمز چمن ایمائی ہے