ufuq ufuq nae suraj nikalte rahte hain

ufuq ufuq na.e sūraj nikalte rahte haiñ

diye jaleñ na jaleñ daaġh jalte rahte haiñ

mirī galī ke makīñ ye mire rafīq-e-safar

ye log vo haiñ jo chehre badalte rahte haiñ

zamāne ko to hamesha safar meñ rahnā hai

jo qāfile na chaleñ raste chalte rahte haiñ

hazār sañg-e-girāñ ho hazār jabr-e-zamāñ

magar hayāt ke chashme ubalte rahte haiñ

ye aur baat ki ham meñ hī sabr-o-zabt nahīñ

ye aur baat ki lamhāt Talte rahte haiñ

ye vaqt-e-shām hai yā rab dil o nazar kī ho ḳhair

ki is samay meñ to saa.e bhī Dhalte rahte haiñ

kabhī vo din the zamāne se āshnā.ī thī

aur ā.īne se ab 'aḳhtar' bahalte rahte haiñ

ufuq ufuq nae suraj nikalte rahte hain

diye jalen na jalen dagh jalte rahte hain

meri gali ke makin ye mere rafiq-e-safar

ye log wo hain jo chehre badalte rahte hain

zamane ko to hamesha safar mein rahna hai

jo qafile na chalen raste chalte rahte hain

hazar sang-e-giran ho hazar jabr-e-zaman

magar hayat ke chashme ubalte rahte hain

ye aur baat ki hum mein hi sabr-o-zabt nahin

ye aur baat ki lamhat Talte rahte hain

ye waqt-e-sham hai ya rab dil o nazar ki ho KHair

ki is samay mein to sae bhi Dhalte rahte hain

kabhi wo din the zamane se aashnai thi

aur aaine se ab 'aKHtar' bahalte rahte hain