toD kar tar-e-nigah ka silsila jata raha

toḌ kar tār-e-nigah kā silsila jaatā rahā

ḳhaak Daal āñkhoñ meñ merī qāfila jaatā rahā

kaun se din haath meñ aayā mire dāmān-e-yār

kab zamīn-o-āsmāñ kā fāsla jaatā rahā

ḳhār-e-sahrā par kisī ne tohmat-e-duzdī na kī

paañv kā majnūñ ke kyā kyā aabla jaatā rahā

dostoñ se is qadar sadme uThā.e jaan par

dil se dushman kī adāvat kā gila jaatā rahā

jab uThāyā paañv 'ātish' misl-e-āvāz-e-jaras

kosoñ pīchhe chhoḌ kar maiñ qāfila jaatā rahā

toD kar tar-e-nigah ka silsila jata raha

KHak Dal aankhon mein meri qafila jata raha

kaun se din hath mein aaya mere daman-e-yar

kab zamin-o-asman ka fasla jata raha

KHar-e-sahra par kisi ne tohmat-e-duzdi na ki

panw ka majnun ke kya kya aabla jata raha

doston se is qadar sadme uThae jaan par

dil se dushman ki adawat ka gila jata raha

jab uThaya panw 'atish' misl-e-awaz-e-jaras

koson pichhe chhoD kar main qafila jata raha