teri baaten hi sunane aae

terī bāteñ hī sunāne aa.e

dost bhī dil hī dukhāne aa.e

phuul khilte haiñ to ham sochte haiñ

tere aane ke zamāne aa.e

aisī kuchh chup sī lagī hai jaise

ham tujhe haal sunāne aa.e

ishq tanhā hai sar-e-manzil-e-ġham

kaun ye bojh uThāne aa.e

ajnabī dost hameñ dekh ki ham

kuchh tujhe yaad dilāne aa.e

dil dhaḌaktā hai safar ke hañgām

kaash phir koī bulāne aa.e

ab to rone se bhī dil dukhtā hai

shāyad ab hosh Thikāne aa.e

kyā kahīñ phir koī bastī ujḌī

log kyuuñ jashn manāne aa.e

so raho maut ke pahlū meñ 'farāz'

niiñd kis vaqt na jaane aa.e

teri baaten hi sunane aae

dost bhi dil hi dukhane aae

phul khilte hain to hum sochte hain

tere aane ke zamane aae

aisi kuchh chup si lagi hai jaise

hum tujhe haal sunane aae

ishq tanha hai sar-e-manzil-e-gham

kaun ye bojh uThane aae

ajnabi dost hamein dekh ki hum

kuchh tujhe yaad dilane aae

dil dhaDakta hai safar ke hangam

kash phir koi bulane aae

ab to rone se bhi dil dukhta hai

shayad ab hosh Thikane aae

kya kahin phir koi basti ujDi

log kyun jashn manane aae

so raho maut ke pahlu mein 'faraaz'

nind kis waqt na jaane aae